Гэты ўдар, напісала Ціханоўская ў сацсетцы Х, накіраваны «супраць цывільнага насельніцтва і крытычна важных аб’ектаў інфраструктуры».
«Украіна павінна атрымаць усё неабходнае для перамогі. Беларусы падтрымліваюць Украіну ў яе гераічнай барацьбе за свабоду», — напісала Ціханоўская.
У ноч на 17 лістапада Расея атакавала Украіну ракетамі і дронамі, мэтай удару сталі ў асноўным аб’екты крытычнай інфраструктуры. Украінскія ўлады назвалі атаку адной з найбуйнейшых з пачатку вайны.
Як паведаміў прэзыдэнт Украіны Ўладзімір Зяленскі, расейскія войскі ў ноч на 17 лістапада выкарыстоўвалі для ўдару па Ўкраіне каля 120 ракет і 90 дронаў. Паводле яго, сілам СПА ўдалося паразіць больш як 140 паветраных цэляў. Удары наносіліся найперш па аб’ектах энэргетычнай інфраструктуры. У шэрагу абласьцей — Адэскай, Валынскай, Вінніцкай, Запароскай — гэтым аб’ектам быў нанесены істотны ўрон. У многіх абласьцях уведзены рэжым экстраных адключэнняў электраэнэргіі, заявіў міністар энэргетыкі Ўкраіны Герман Галушчанка.
ГЛЯДЗІЦЕ ТАКСАМА: Армія Расеі нанесла канцэнтраваны ўдар па Ўкраіне дронамі і крылатымі ракетамі. Ёсьць ахвярыМіністар замежных справаў Украіны Андрэй Сібіга назваў сёньняшнюю атаку па энергетычнай інфраструктуры адной з найбуйнейшых за ўсю гісторыю цяперашняй вайны. «Гэта сапраўдны адказ ваеннага злачынца Пуціна ўсім, хто нядаўна тэлефанаваў яму і прыяжджаў да яго. Нам патрэбен мір, якога можна дасягнуць сілай, а не ўгаворамі», — напісаў ён у сацсетцы Х.
Паведамляецца аб пяці загінулых. У Мікалаеве пры нападзе БПЛА загінулі дзве жанчыны, мужчыны 41 і 44 гадоў загінулі ў Адэскай вобласьці, у Львоўскай вобласьці забіта 66-гадовая пэнсіянэрка. Паведамляецца таксама аб вялікай колькасьці параненых.