Былы прэтэндэнт на пасаду прэзыдэнта Беларусі Валер Цапкала паведаміў у сваім тэлеграм-канале, што ягоны аўтамабіль арыштавалі на альбанска-грэцкай мяжы. Выявілася, што машына лічыцца ў базе Інтэрпола.
Палітык здолеў забраць машыну са штраф-стаянкі на мяжы. Ён мяркуе, што ў базу вышуку Інтэрполу яго аўтамабіль унёс рэжым Лукашэнкі: «Для ўсіх нас зразумела, хто ўнёс гэтую машыну ў базу зьвестак Інтэрполу, хто мае доступ».
Цапкала заяўляе, што інцыдэнт зь ягоным аўтамабілем парушае артыкул 3 статуту Інтэрполу. Гэты артыкул забараняе выкарыстоўваць сыстэму «чырвоных апавяшчэньняў» для перасьледу з палітычных, рэлігійных або расавых матываў. Палітык кажа, што зьвяртаўся ў міжнародныя арганізацыі (у тым ліку ААН) з прапановай спыніць практыку выкарыстаньня «чырвоных апавяшчэньняў» Інтэрполу, бо яны супярэчаць прэзумпцыі невінаватасьці.
ГЛЯДЗІЦЕ ТАКСАМА: Улады прадаюць дом Цапкалаў, у якім прапісаныя іх дзеціТаксама Цапкала паведаміў, што напісаў у Інтэрпол ліст з патрабаваньнем выключыць Беларусь са складу гэтай арганізацыі альбо прыпыніць яе ўдзел да зьмены ўлады.
Ён прапануе абодва гэтыя пытаньні абмеркаваць на наступнай канфэрэнцыі Інтэрполу ў Глазга, у Вялікай Брытаніі, дзе зьбяруцца кіраўнікі міністэрстваў унутраных справаў краінаў-удзельніц.
- Валер Цапкала ў мінулым кіраваў беларускім Паркам высокіх тэхналёгій. Для ўдзелу ў прэзыдэнцкай кампаніі 2020 году ён сабраў ініцыятыўную групу. Аднак ЦВК адмовіла яму ў рэгістрацыі, бо нібыта сапраўдных подпісаў пасьля праверкі выявілася менш за сто тысяч. Калі палітыка не дапусьцілі да ўдзелу ў выбарах, ягоная жонка Вераніка далучылася да аб’яднанага штабу Сьвятланы Ціханоўскай.
- Сам палітык пакінуў краіну ў ліпені 2020 году, баючыся крымінальнага перасьледу. Пазьней да яго ў Латвію пераехалі жонка і дзеці.
- У красавіку 2023 году Менскі абласны суд завочна прысудзіў яму 17 гадоў пазбаўленьня волі ў калёніі ўзмоцненага рэжыму і штраф у памеры 1000 базавых велічынь, а таксама пазбавіў права займаць пасады, зьвязаныя з выкананьнем арганізацыйна-распарадчых і адміністрацыйна-гаспадарчых абавязкаў, на працягу 5 гадоў.