Беларусь як найбуйнейшы пастаўшчык масла ў Расею, сёлета павялічыла яго пастаўку на расейскі рынак на 9% да 110 тысяч тон.
Як паведаміла агенцтва Reuters, разам з тым Расея пачала набываць масла яшчэ ў некалькіх краінах, у тым ліку ў Аб’яднаных Арабскіх Эміратах (ААЭ) і ў Турэччыне, каб стрымаць рэзкае павышэньне цэнаў, што выклікала занепакоенасьць на спажывецкім рынку.
У Фэдэральнай службе вэтэрынарнага і фітасанітарнага нагляду Расеі (Рассельгаснагляд) удакладнілі, што раней Расея не купляла масла ў ААЭ. З 18 кастрычніка з гэтай краіны на расейскі рынак прывезьлі 90 тон масла.
Згодна зь інфармацыяй Дзяржстату Расеі, са сьнежня мінулага году масла падаражэла на 25,7 адсотка пры інфляцыі ў 8,6%. Павелічэньне цэнаў, паведаміла агенцтва, выклікала хвалю крадзяжоў масла ў некаторых супэрмаркетах.