28 кастрычніка ў цэнтры Тбілісі праходзіць акцыя пратэсту супраць вынікаў парлямэнцкіх выбараў, паводле якіх кіроўная прарасейская партыя «Грузінская мара» застаецца ва ўладзе і зможа сфармаваць урад у чацьвёрты раз.
Галоўную вуліцу Тбілісі, праспэкт Руставелі, увечары 28 кастрычніка перакрылі ўдзельнікі мітынгу. Як паведамляе RusNews, на плошчы каля грузінскага парлямэнта сабраліся «тысячы пратэстоўцаў», людзі працягваюць падыходзіць. У натоўпе бачныя сьцягі Грузіі, Украіны і Эўразьвязу.
Паводле ацэнкі карэспандэнта «Дождя», у акцыі ўдзельнічаюць тысячы дэманстрантаў. На мітынг у тым ліку прыбыла прэзыдэнтка Грузіі Саламэ Зурабішвілі, якая зьвярнулася да прысутных.
Прэзыдэнтка Грузіі Саламэ Зурабішвілі выступае перад пратэстоўцамі
Падчас свайго выступу Саламэ Зурабішвілі заявіла ў чарговы раз, што вынікі парлямэнцкіх выбараў былі скрадзеныя і «іх ніхто не прызнае».
«Я хачу вам сказаць, што вы, якія знаходзіцеся тут, не прайгралі выбары. Яны скралі ваш голас і спрабавалі скрасьці вашу будучыню, ніхто ня мае на гэта права, і вы нікому гэтага не дазволіце... Я магу паклясьціся, што буду з вамі да канца гэтай эўрапэйскай дарогі і пакуль мы не дасягнем дзьвярэй Эўропы, што ня проста зьяўляецца нашай марай, а рэальнасьцю, будучыняй, і ў нас няма альтэрнатывы, і мы ня хочам пакінуць гэтай краіне для наступных пакаленьняў нічога іншага акрамя незалежнасьці, свабоды, эўрапэйскасьці і грузінскай ідэнтычнасьці, якая ідзе за намі і такая каштоўная», — заявіла Зурабішвілі.
Грузінскія апазыцыйныя партыі, якія не прызнаюць вынікі парлямэнцкіх выбараў у краіне, патрабуюць правядзеньня паўторных выбараў. Іх павінна арганізаваць «міжнародная адміністрацыя», заявіў адзін зь лідэраў партыі «Адзінства-Нацыянальны рух» Георгій Вашадзэ на мітынгу ля парлямэнта Грузіі.
Георгій Вашадзэ
Вашадзэ азнаёміў пратэстоўцаў з рашэньнямі апанэнтаў уладаў:
«Першае: і вы, і мы лічым гэтыя выбары нелегітымнымі.
Другое — мы не зьбіраемся ўваходзіць у гэты парлямэнт, адмаўляемся ад усіх мандатаў і анулюем сьпісы.
Трэцяе — мы будзем змагацца да таго часу, пакуль не пераможам, і мы абяцаем, што пераможам.
Чацьвёртае — у нас вельмі канкрэтнае патрабаваньне: гэта — правесьці выбары нанова, але правесьці іх павінна міжнародная выбарчая адміністрацыя».
Вашадзэ таксама заявіў, што апазыцыя ня мае намеру весьці якія-небудзь перамовы з «Грузінскай марай».
«Адзіныя перамовы і пагадненьні павінны тычыцца паўторнага правядзеньня выбараў», — заявіў Вашадзэ.
Пратэстоўцы з плякатам «Грузія — не Расея»
Пратэстоўцы асьвісталі картэж Віктара Орбана, які прыехаў у Тбілісі
Раней стала вядома, што прэм’ер-міністар Вугоршчыны Віктар Орбан наведае Грузію 28-29 кастрычніка. Ён стаў першым замежным лідэрам, які павіншаваў кіроўную ў Грузіі партыю «Грузінская мара» зь перамогай на парлямэнцкіх выбарах 26 кастрычніка: вугорскі прэм'ер гэта зрабіў яшчэ да таго, як зьявіліся першыя афіцыйныя вынікі галасаваньня.
Пасьля прылёту ў сталіцу Грузіі Орбан спыніўся ў гатэлі Марыёт на праспэкце Руставелі. Непадалёк ад гэтага месца праходзіць мітынг супраць фальсыфікацыі парлямэнцкіх выбараў.
У момант, калі паўз гатэль праходзілі пратэстоўцы, з будынка выйшаў Орбан у суправаджэньні аховы. Маніфэстанты пачалі асьвістваць палітыка.
На відэа, апублікаваным у тэлеграм-канале журналісткі Кацярыны Котрыкадзэ, чуваць, як прысутныя крычалі Орбану «Курва». Выданьне Paper Kartuli удакладняе, што на адрас вугорскага прэм’ера таксама гучалі воклічы «Пуцін — х**ло» і «Русэбо» («Рускія»).
Візыт у Грузію прэм’ер-міністра Вугоршчыны Віктара Орбана падчас свайго выступу на мітынгу пракамэнтавала і прэзыдэнтка Саламэ Зурабішвілі:
«Ніхто, акрамя аднаго чалавека (Орбана — рэд.) не прызнае гэтыя выбары», — заявіла Зурабішвілі, растлумачыўшы, што пасьля выбараў мела зносіны са шматлікімі эўрапэйскімі лідэрамі:
«Я размаўляла з прэзыдэнтамі эўрапэйскіх краін. Я размаўляла зь міністрамі замежных спраў. Вы, напэўна, чыталі, усе ацэнкі і пасланьні падтрымкі, якія зыходзяць з розных эўрапэйскіх краін, а таксама з Амэрыкі, мы ўбачылі вельмі выразную заяву дзяржсакратара. Нам усе гавораць адно: ніхто не прызнае гэтыя выбары, але ўсе гавораць нам, што мы павінны працягнуць расьсьледаваньне і давесьці яго да канца, і дарэчы, мы можам атрымаць міжнародную падтрымку для гэтага, каб гэтае расьсьледаваньне было дбайным і не пакінула ніводнага пытаньня без адказу».
ГЛЯДЗІЦЕ ТАКСАМА: Орбан едзе ў пасьлявыбарную Грузію. У Брусэлі заявілі, што яму не давалі паўнамоцтваў ад ЭЗУ Грузіі 26 кастрычніка адбыліся парлямэнцкія выбары, на якіх абвясьцілі перамогу кіроўнай партыі «Грузінская мара». Прэзыдэнтка Грузіі Саламэ Зурабішвілі заявіла, што не прызнае вынікаў парлямэнцкіх выбараў і што Грузія стала ахвярай «расейскай спэцапэрацыі», і заклікала грузінскі народ выходзіць на пратэсты.
Раней усе чатыры грузінскія апазыцыйныя партыі, якія пераадолелі 5-працэнтны бар’ер, не прызналі вынікі выбараў і заявілі аб нежаданьні ўваходзіць у новы парлямэнт.
ГЛЯДЗІЦЕ ТАКСАМА: У ЭЗ і ЗША заклікалі Грузію расьсьледаваць парушэньні на выбарах і скасаваць недэмакратычныя законы