Расейскі Цэнтрабанк падняў ключавую стаўку на максымальную за 20 гадоў вышыню

25 кастрычніка расейскі Цэнтрабанк павысіў ключавую стаўку да максымальнага ўзроўню за 20 гадоў — да 21%. Гэта трэцяе падвышэньне ключавой стаўкі запар, яна вырасла адразу на 2%.

Апошні раз на такім узроўні стаўка была ў 2003 годзе. Паказьнік пастаянна зьніжаўся з 1998 году, калі яго значэньне дасягнула 150%.

Павышэньне стаўкі павялічвае кошт крэдытаў для эканомікі і насельніцтва і зьніжае эканамічны рост, што павінна прывесьці да зьніжэньня інфляцыі.

У тлумачэньні расейскага Цэнтрабанку гаворыцца, што прычынай такога рашэньня стаў істотна вышэйшы за прагнозны рост інфляцыі і рост інфляцыйных чаканьняў.

«Рост унутранага попыту значна апярэджвае магчымасьці пашырэньня прапановы тавараў і паслуг. Дадатковыя выдаткі бюджэту і адпаведнае пашырэньне дэфіцыту фэдэральнага бюджэту ў 2024 годзе аказваюць праінфляцыйны эфэкт», — гаворыцца ў паведамленьні банку.

Цэнтрабанк таксама падкрэсьліў зьніжэньне тэмпаў эканамічнага росту ў краіне. Тлумачыцца гэта недахопам працоўнай сілы і вытворчых магутнасьцяў.

Адметна, што ў кастрычніку Міжнародны валютны фонд павысіў прагноз росту расейскай эканомікі па выніках году да 3,6%.