У Паўночнаатлянтычным альянсе паведамілі пра дэталі ядзерных вучэньняў Steadfast Noon («Устойлівы поўдзень»), якія пачаліся 14 кастрычніка ў паветранай прасторы Вялікай Брытаніі, Бэльгіі і Нідэрляндаў.
Як адзначаецца ў афіцыйным паведамленьні, сёлета ў вучэньнях задзейнічаныя 2000 вайскоўцаў з васьмі авіябаз і розныя тыпы самалётаў, у тым ліку рэактыўныя самалёты, здольныя несьці ядзерную зброю, бамбавікі, зьнішчальнікі суправаджэньня, самалёты-танкеры і самалёты, здольныя весьці выведку і радыёэлектронную барацьбу.
Свае самалёты на вучэньні накіруюць 13 краін-сябраў альянсу.
«Ядзернае стрымліваньне зьяўляецца краевугольным каменем бясьпекі хаўрусьнікаў. [...]Steadfast Noon зьяўляюцца важным выпрабаваньнем ядзернага стрымліваньня альянсу і пасылае выразнае паведамленьне любому праціўніку, што NATO будзе абараняцца і абараняць усіх хаўрусьнікаў», — сказаў генэральны сакратар арганізацыі Марк Рутэ.
ГЛЯДЗІЦЕ ТАКСАМА: «Танкі на Польшчу зь Беларусі ня пойдуць — паляцяць ядзерныя ракеты». Як беларусаў адвучваюць ад страху перад вайной
Вучэньні праводзяць без сапраўднай ядзернай зброі
Вайсковыя экспэрты адзначаюць, што ў часе гэтых штогадовых вучэньняў адпрацоўваюць бясьпечную дастаўку ядзернай зброі зь месцаў захоўваньня да самалётаў і ўсталяваньне яе для прымяненьня. Аднак навучальныя палёты праводзяцца без выкарыстаньня сапраўднай зброі, паведаміла агенцтва DPA.
Праграма NATO па супольным выкарыстаньні ядзернай зброі прадугледжвае, што амэрыканскай ядзернай зброяй, разьмешчанай у Эўропе, у надзвычайных сытуацыях могуць атакаваць аб’екты праціўніка з самалётаў краін-партнэраў. Мяркуецца, што сама зброя захоўваецца на поўначы Італіі, у Турэччыне, Бэльгіі, Нідэрляндах, а таксама на базе Бюхель у Нямеччыне.
Ядзерныя пагрозы
Сёлетнія вучэньні пачнуцца празь некалькі тыдняў пасьля таго, як Уладзімір Пуцін абвясьціў пра зьмены ў ядзернай дактрыне Расеі, што назіральнікі ў значнай ступені расцанілі як яшчэ адну спробу падарваць падтрымку Ўкраіны заходнімі саюзьнікамі, у тым ліку дазвол на нанясеньне ўдараў у глыб Расеі.
Сярод іншага, у канцы верасьня Пуцін заявіў, што напад на Расею з боку любой бязьядзернай дзяржавы пры падтрымцы ядзернай дзяржавы будзе разглядацца як іх сумесная атака і можа выклікаць ядзерны адказ Масквы.
Верагодна, гэтая пагроза «істотна зьнізіла парог магчымага выкарыстаньня ядзернага арсэналу Расеі», адзначае агенцтва Associated Press. Аднак ніякіх рэальных зьменаў у ядзернай пазыцыі Масквы NATO пакуль не назірае, дадае агенцтва.
У прыватнасьці, пры ўступленьні на пасаду 1 кастрычніка Рутэ адзначыў, што няма доказаў якой-небудзь непасрэднай пагрозы выкарыстаньня ядзернай зброі, нягледзячы на «неабдуманую і безадказную» ядзерную рыторыку Пуціна.
Гаворачы пра свой ядзерны арсэнал, Рутэ адзначыў, што Пуцін «хоча, каб мы абмяркоўвалі і ягоны ядзерны арсэнал, і я думаю, што мы не павінны гэтага рабіць», цытуе АР.
Раней Уладзімір Пуцін і Аляксандар Лукашэнка заяўлялі, што перавялі ў Беларусь расейскую тактычную зброю.
ГЛЯДЗІЦЕ ТАКСАМА: Сёлетнім ляўрэатам Нобэлеўскай прэміі міру стала арганізацыя ацалелых пасьля атамных бамбаваньняў Японіі