У Берасьці прайшоў 11-ы групавы суд за ўдзел у пратэстах у жніўні 2020 году

Гэтым разам пад суд за ўдзел у акцыі пратэсту 10 жніўня 2020 году ў Берасьці трапілі тры чалавекі — Сяргей Нічыпарук, Аляксандар Клімашэвіч і Яўген Бычко. Паводле падлікаў праваабаронцаў, гэта ўжо адзінаццатая група людзей, якіх асудзілі ў Берасьці за «грубае парушэньне грамадзкага парадку» ў 2020 годзе.

Крымінальную справу супраць берасьцейцаў разглядала судзьдзя Крысьціна Папова, вынікае з прэс-рэлізу суду, які заўважылі праваабаронцы «Берасьцейскай Вясны».

У выніку разгляду справы Крысьціна Папова прысудзіла ўсім берасьцейцам тэрміны ў калёніі:

• Сяргей Нічыпарук — 1 год 6 месяцаў калёніі агульнага рэжыму;
• Аляксандар Клімашэвіч — 1 год калёніі агульнага рэжыму;
• Яўген Бычко — 1 год калёніі агульнага рэжыму.

Істота абвінавачваньня супраць усіх палягала ў тым, што людзі 10 жніўня 2020 году ў Берасьці «выкрыквалі лёзунгі, дэманстравалі палотны бел-чырвона-белага колеру, наўмысна перашкаджалі руху транспартных сродкаў і нармальнаму функцыянаваньню прадпрыемстваў». Гэтым яны нібыта груба парушалі грамадзкі парадак.

Праваабаронцам вядома, што дырэктара берасьцейскай кампаніі Яўгена Бычко жорстка затрымалі на трасе M1 сёлета ў сярэдзіне ліпеня. Мужчыну спынілі супрацоўнікі ДАІ, а пазьней пад’ехалі сілавікі, якія яго і затрымалі. На прымусовым відэа сілавікоў берасьцеец казаў, што ўдзельнічаў у пасьлявыбарчай акцыі пратэсту ў Берасьці.

Агулам праваабаронцам вядома што ўжо 61 чалавеку прысудзілі тэрміны паводле арт. 342 Крымінальнага кодэксу за пратэсты 10 жніўня 2020 году ў Берасьці. Паводле гэтага артыкулу судзяць з фармулёўкай «выкрыквалі лёзунгі, дэманстравалі палотны бел-чырвона-белага колеру, выходзілі на праезную частку» — гэта значыць людзей судзяць за рэалізацыю права на мірны пратэст, адзначаюць праваабаронцы. Абсалютную большасьць асуджаных за тыя акцыі пратэсту асудзілі на пазбаўленьне волі.