Ганна Златкоўская пакінула Беларусь у лістападзе 2020 году. Днямі стала вядома пра тое, што на яе завялі крымінальную справу.
8 кастрычніка ў Менску сілавікі прыйшлі зь ператрусам у кватэру да маці журналісткі Ганны Златкоўскай, піша БАЖ. Пра гэта яна паведаміла на сваёй старонцы ў Facebook.
У гэты ж дзень стала вядома, што супраць Златкоўскай у Беларусі распачалі крымінальную справу, а на яе маёмасьць — лецішча — наклалі арышт. Паводле якога артыкулу перасьледуюць журналістку і ў чым сутнасьць абвінавачаньня, пакуль невядома.
«Што гэта за крымінальная справа супраць мяне, маці не паведамілі. Паводле іх, сказаць могуць толькі мне. У органах, відаць, ведаюць, што я ў Літве. Як яны будуць паведамляць асабіста мне, ня ведаю. Думаю патэлефанаваць ім, але сумняваюся, што гэта дапаможа. Хутчэй, ветліва прапануюць прыехаць і паабяцаюць усё расказаць пры сустрэчы», — казала Златкоўская.
Лецішча — адзіная нерухомасьць, якая належыць журналістцы.
Ганна Златкоўская — пісьменьніца, журналістка, калюмністка. Аўтарка дзьвюх кніг прозы: «Страшна жыць, мама» і «Паляваньне на матылькоў». Супрацоўнічала з шэрагам незалежных СМІ і мэдыяпраектаў.
ГЛЯДЗІЦЕ ТАКСАМА: Сьледчы камітэт арыштаваў хату кіраўніка «Белсату» на Піншчыне, якую пабудаваў яго дзед, вязень ГУЛАГу ГЛЯДЗІЦЕ ТАКСАМА: Блогерку Алену Янушкоўскую праз суд выпісваюць з хаты, якую арыштавалі і прадалі ў яе адсутнасьць