1 кастрычніка Сэйм Літвы пастанавіў дэнансаваць дамову зь Беларусьсю аб садзейнічаньні і абароне інвэстыцыяў, прыняўшы адпаведны закон, паведамляе прэс-служба літоўскага парлямэнту.
Дэпутаты падтрымалі дэнансацыю пагадненьня зь Беларусьсю аб заахвочваньні і абароне інвэстыцыяў, падпісанага ў 1999 годзе.
Акрамя гэтага, Літва разрывае аналягічнае пагадненьне з Расеяй, а таксама пагадненьне з Расеяй аб прадухіленьні двайнога падаткаабкладаньня.
Рашэньне дэнансаваць дамовы абгрунтаванае «беспрэцэдэнтнай ваеннай агрэсіяй Расеі і яе саўдзельніка Беларусі супраць Украіны і грубага парушэньня міжнароднага права». У прэс-рэлізе таксама адзначаецца, што на практыцы «трансмежавае эканамічнае супрацоўніцтва зь дзяржавамі-агрэсарамі цалкам прыпыненае і немагчымае».
Скасаваньне кантрактаў набудзе моц праз 12 месяцаў з дня атрыманьня паведамленьня ўрадамі Беларусі і Расеі, якіх апавясьцяць па дыпляматычных каналах. Інвэстыцыі, ажыцьцёўленыя да заканчэньня кантрактаў, будуць абароненыя яшчэ на працягу 10 гадоў.
ГЛЯДЗІЦЕ ТАКСАМА: Прэзыдэнт Літвы прапанаваў Сейму дэнансаваць пагадненьне зь Беларусьсю аб заахвочваньні і абароне інвэстыцый- 16 верасьня прэзыдэнт Літвы Гітанас Наўседа ўнёс у Сэйм прапанову аб дэнансацыі трох названых дамоваў з Расеяй і Беларусьсю.
- 24 верасьня Сэйм Літвы ухваліў дэнансацыю гэтых дамоваў у першым чытаньні.
- 25 верасьня стала вядома, што ўрад Літвы ўхваліў падрыхтаваныя Міністэрствам фінансаў праекты прававых актаў аб дэнансацыі пагадненьняў аб мытным супрацоўніцтве зь Беларусьсю і Расеяй.