Намесьнік генэральнага пракурора Беларусі папярэдзіў дырэктара беларускага аддзелу інтэрнэт-крамы Wildberries аб неабходнасьці зьліквідаваць «прычыны і ўмовы, якія садзейнічалі рэалізацыі фізычным асобам бесьпілётных лётных апаратаў, авіямадэляў і запасных частак да іх».
Як адзначаецца ў афіцыйным паведамленьні Генэральнай пракуратуры, «бескантрольны распаўсюд названай авіяцыйнай тэхнікі можа нэгатыўна паўплываць на грамадзкую бясьпеку, бо павялічвае рызыкі яе выкарыстаньня ў супрацьпраўных мэтах, у тым ліку для парушэньня грамадзкага парадку, экстрэмісцкай дзейнасьці і ўчыненьня актаў тэрарызму».
У Генэральнай пракуратуры нагадалі, што летась у верасьні Аляксандар Лукашэнка падпісаў указ аб забароне фізычным асобам увозіць, захоўваць і эксплюатаваць бесьпілётнікі.