У Міністэрстве абароны Беларусі паведамілі аб пачатку чарговага этапу праверкі злучэньняў і вайсковых частак Узброеных сілаў.
Як адзначаецца ў афіцыйным паведамленьні, праверка пачалася 30 верасьня і будзе праходзіць пад кіраўніцтвам начальніка Генэральнага штабу Ўзброеных сілаў Беларусі, першага намесьніка міністра абароны Паўла Муравейкі.
«Асноўны акцэнт праверкі — на гатоўнасьці і здольнасьці вайсковых частак і падразьдзелаў Вайскова-паветраных сіл і войскаў супрацьпаветранай абароны выконваць свае задачы», — паведаміла прэсавая служба ведамства.
У Міністэрстве абароны ўдакладнілі, што «мерапрыемствы праверкі будуць плянава нарошчвацца з залучэньнем для выкананьня навучальна-баявых задач усіх палігонаў Узброеных сіл».
У ведамстве папярэдзілі, што ў часе праверкі будзе перамяшчацца вайсковая тэхніка, магчымыя часовыя абмежаваньні руху цывільнага транспарту на дарогах агульнага карыстаньня.
- Аляксандар Лукашэнка падтрымаў расейскае ваеннае ўварваньне ва Ўкраіну 24 лютага 2022 году і дазволіў скарыстаць тэрыторыю, вайсковую інфраструктуру і паветраную прастору Беларусі для ўварваньня расейскай арміі і абстрэлаў гарадоў Украіны, ахвярамі чаго сталі дзясяткі тысяч мірных украінцаў.
- Тысячы расейскіх вайскоўцаў увайшлі ва Ўкраіну зь Беларусі ў пачатку ўварваньня, зь беларускай тэрыторыі запускалі балістычныя ракеты па Ўкраіне, з паветранай прасторы Беларусі запускалі ракеты расейскія бамбавікі.
- За падтрымку Аляксандрам Лукашэнкам расейскага ўварваньня ва Ўкраіну супраць Беларусі ўвялі міжнародныя санкцыі.
- Увесь час ад пачатку расейскай поўнамаштабнай вайны супраць Украіны на тэрыторыі Беларусі амаль бесьперапынна праводзяцца вайсковыя вучэньні, а Ўкраіна ўмацоўвае свае межы зь Беларусьсю.