Хроніка перасьледу 19 верасьня: на Гомельшчыне затрымалі 7 чалавек; у Глыбокім — сама меней 5

У Гомельскай вобласьці затрымалі сама меней 7 чалавек

Сілавікі затрымалі ў Гомельскай вобласьці сама меней 7 чалавек. Іх абвінавачваюць у падпісках на «экстрэмісцкія» каналы.

Відэа з затрыманымі апублікаваў блізкі да сілавікоў тэлеграм-канал, піша «Медиазона». На камэру некаторыя затрыманыя кажуць, што былі падпісаныя на «забароненыя» каналы. Адна з затрыманых на відэа прызнаецца, што дрэнна ставіцца да дзейнай улады. Яшчэ адзін з паказаных у роліку кажа, што ня мае ніякіх падпісак і не зьяўляецца «палітычным чалавекам».

У трох з 7 чалавек, якіх паказалі ў роліку, схаваныя твары. Хоць двое зь іх таксама паведамляюць, што былі падпісаныя на «забароненыя» каналы і пакідалі там камэнтары.

Паводле якога артыкула затрымалі людзей і дзе яны цяпер, невядома.

«Хапун» у Глыбокім — затрымалі мінімум 5 чалавек

У Глыбокім сілавікі затрымалі сама меней 5 чалавек, паведамляе «Вясна». Відэа з затрыманымі апублікаваў адзін з праўладных каналаў, блізкі да сілавікоў.

Іх усіх абвінавачваюць ва ўдзеле ў пасьлявыбарных акцыях пратэсту ў Беларусі. На відэа сілавікоў паказана, як аднаго з затрыманых са зламанай рукой паклалі тварам на падлогу.

Паводле зьвестак «Віцебскай Вясны», затрымалі 12 чалавек, у тым ліку краязнаўцу і даўняга грамадзкага актывіста Паўла Лаўрыновіча. Частку затрыманых адразу адвезьлі ў Віцебскі сьледчы ізалятар. Ім інкрымінуюць арт. 342 КК (арганізацыя, падрыхтоўка або ўдзел у дзеяньнях, якія груба парушаюць грамадзкі парадак).

Сцэнарыста з Барысава будуць судзіць за «заклікі да санкцыяў»

Кірыла Вевеля, 40-гадовага сцэнарыста з Барысава, будуць судзіць паводле артыкула аб закліках да дзеяньняў супраць нацыянальнай бясьпекі (артыкул 361 Крымінальнага кодэксу), піша «Наша ніва». Суд пачне разглядаць ягоную справу 23 верасьня.

Кірыла Вевеля затрымалі ў студзені 2024 году. Спачатку яго адправілі на «суткі», абвінаваціўшы ў «дробным хуліганстве» (артыкул 19.1 КаАП), а пасьля завялі крымінальную справу.

Кірыл Вевель скончыў БДУ, працаваў у некалькіх арганізацыях, якія прадаюць прамысловую тэхніку, сам быў заснавальнікам кампаніі «Грыккам-вектар», яна праіснавала з 2015 па 2021 год. Пісаў песьні і сцэнары, значыцца ў рэестры нацыянальных праваўладальнікаў.

У Століне затрымалі як мінімум 5 чалавек

Праўладныя тэлеграм-каналы пішуць, што затрыманыя «займаліся экстрэмісцкай дзейнасьцю», паведамляе «Вясна».