У Львове 9 верасьня адкрыўся Беларускі дом і на яго базе музэй «Свабодная Беларусь з Украінай у сэрцы», паведаміў заснавальнік дабрачыннага фонду «Свабодная Беларусь» Аляксей Францкевіч.
Пра гэта піша інфармацыйнае агенцтва «Позірк».
Паводле слоў Францкевіча, мэта праекту — «расказаць усяму сьвету аб тым, што беларуская нацыя поруч з украінцамі стаіць на абароне ўсяго цывілізаванага сьвету ад Расейскай імпэрыі».
Музэй прысьвечаны памяці беларусам, якія аддалі свае жыцьці за Ўкраіну, пачынаючы з падзеяў на Майдане Незалежнасьці ў 2014 годзе і пазьней у вайне Расеі з Украінай.
«Больш за 70 беларускіх герояў» загінулі за Ўкраіну, удакладніў актывіст.
У Беларускім доме, анансаваў ён, плянуецца аднавіць дзейнасьць нядзельнай беларускай школы, якая працавала ў горадзе да пэрыяду поўнамаштабнага ўварваньня Расеі. У школе будуць вывучаць беларускую мову.