Расейская вэрсія часопісу Forbes апублікавала рэйтынг 50 найбуйнейшых замежных кампаній у Расеі паводле выручкі ў 2023 годзе.
У 2022 годзе ў рэйтынг ня трапіла ніводная кампанія з Беларусі. У 2023 годзе іх было дзьве — «Гандлёвы дом БелАЗ / БелАЗ Холдынг» (38 месца ў рэйтынгу) і група Santa (брэнды «Савушкин продукт» і «Русское море») (39 месца).
У сёлетнім рэйтынгу ўжо чатыры кампаніі беларускага паходжаньня. У сьпіс упершыню трапілі «Гандлёвы дом БМЗ / Беларускі металюргічны завод» (26 месца і 94,3 млрд расейскіх рублёў выручкі) і вытворца грузавой і пасажырскай тэхнікі МАЗ-Рус / МАЗ (48 месца і 48,5 млрд рублёў). Падняліся ў рэйтынгу «БелАЗ Холдынг» (28 месца, 88,3 млрд расейскіх рублёў выручкі) і група Santa (29 месца і 83,9 млрд рублёў).
Узначаліў рэйтынг вытворца легкавых аўтамабіляў Chery з Кітаю. Аналітыкі адзначаюць, што кітайскі бізнэс прыходзіць на зьмену заходнім кампаніям, якія сыходзяць з Расеі пасьля маштабнага расейскага ўварваньня ва Ўкраіну.
ГЛЯДЗІЦЕ ТАКСАМА: Беларуска ўвайшла ў топ-5 найбагацейшых жанчын Расеі