«ПіК Свабоды». У Расеі замала рэсурсаў, каб цяпер акупаваць Беларусь, — Латушка

Пра гэта ў праграме «ПіК Свабоды» гаворыць Павал Латушка, намесьнік кіраўніка Аб'яднанага пераходнага кабінэту, кіраўнік «Народнага антыкрызіснага ўпраўленьня».

Цалкам размову глядзіце ў відэафармаце на Youtube:

Фрагмэнты размовы:

• Калі б у Беларусі быў дэмакратычны ўрад, наўрад бы можна было б уявіць вайну, якую цяпер у такім маштабе вядзе Расея супраць Украіны з такімі жудаснымі наступствамі.
• Мне падаецца стратэгічнай памылкай падыход заходніх палітыкаў, што трэба спачатку вырашыць праблемы Расеі, а потым вырашыцца праблема Беларусі.
• Час дамагацца зьменаў у Беларусі — менавіта цяпер, калі расейская ўвага скіраваная перадусім у бок Украіны, калі Расеі не хапае рэсурсаў (і доказам гэтаму зьяўляюцца актыўныя дзеяньні Ўзброеных сілаў Украіны на тэрыторыі Курскай вобласьці і ўдары па вайсковых аб'ектах на тэрыторыі РФ).
• Быў выцек інфармацыі з адміністрацыі Пуціна, што Расея распрацавала праграму фактычнай інкарпарацыі Беларусі да 2030 году. Расея ня хоча рабіць ваенных дзеяньняў, але будзе паступова забіраць наш сувэрэнітэт і ідэнтычнасьць. Гэта галоўная пагроза.
• Нават у цяперашніх умовах трэба дабівацца нашай галоўнай стратэгічнай мэты — зьмены палітычнага рэжыму ў Беларусі.

• Стратэгія Эўразьвязу павінна быць арыентаваная на падтрымку незалежных беларускіх СМІ, адукацыі, на адкрыцьцё межаў для беларусаў. Мы павінны падтрымліваць праэўрапейска арыентаваную беларускую нацыю.
• Пад гэтую стратэгію павінны быць фінансавыя рэсурсы. Некалі дэмакратычныя сілы дамагліся зарэзэрваваць у бюджэце Эўразьвязу 3 мільярды эўра на стабілізацыю сытуацыі ў Беларусі ў пераходны пэрыяд. Але мы можам не дачакацца гэтых сродкаў. Магчыма, прыйшоў час ставіць пытаньне перад эўрапейскімі партнэрамі пра размарожваньне гэтых сродкаў на адукацыю і незалежныя СМІ.
• Апошнія сустрэчы з прадстаўнікамі некалькіх краінаў на форуме Globsec у Празе мяне зматывавалі. Ніхто ня хоча адмаўляцца ад санкцыйнага ціску. Прадстаўнікі Швэцыі, Славеніі, Чэхіі, наадварот, казалі, што трэба ўзмацняць ціск, бо Лукашэнка не спыняе дапамогу Расеі ў вайне супраць Украіны, не прыпыняе рэпрэсій.
• У 2020 годзе былі патрабаваньні спыніць рэпрэсіі, правесьці дэмакратычныя выбары і прыцягнуць да адказнасьці вінаватых у злачынствах. Ад гэтага адмаўляцца нельга.
• Важна, калі людзі выходзяць на волю — я казаў заходнікам, што мы павінны весьці барацьбу за кожную палітзьняволеную і кожнага палітзьняволенага. Але пакуль не спыніліся рэпрэсіі, не выпадае казаць, што гэта сыгналы рэжыму аб саступках.