Паўночная Карэя адправіла ў Расею больш за 13 тысяч марскіх кантэйнэраў зь сярэдзіны 2022 году. У іх, як мяркуецца, знаходзілася зброя. Аб гэтым піша Newsweek са спасылкай на дадзеныя выведкі Паўднёвай Карэі.
КНДР праз свой усходні порт Наджын на працягу двух гадоў пасьля ўварваньня Расеі ва Ўкраіну ажыцьцяўляе пастаўкі зброі. У адпраўленых кантэйнэрах магло знаходзіцца больш за шэсьць мільёнаў 152-мілімэтровых артылерыйскіх снарадаў. Таксама КНДР адправіла 122-мілімэтровыя артылерыйскія снарады, мабільныя зэнітныя ракетныя комплексы, супрацьтанкавыя ракеты і іншую вайсковую тэхніку і зброю, гаворыцца ў публікацыі.
Колькасьць марскіх паставак амаль удвая перавышае лічбу, названую паўднёвакарэйскую выведкай у лютым 2024 году. Тады міністар абароны Паўднёвай Карэі Сін Вон Сік заявіў, што Пхэньян адправіў Расеі амаль 7 тысяч марскіх кантэйнэраў з узбраеньнем.
У чэрвені ў размове з журналістамі Bloomberg паўднёвакарэйскі міністр абароны заявіў, што КНДР адправіла ў Расею больш за 5 мільёнаў снарадаў для артылерыі.
У абмен на пастаўкі зброі Расея дае КНДР энэргарэсурсы, а таксама касьмічныя тэхналёгіі для стварэньня ракет і спадарожнікаў-шпіёнаў.
Расея актыўна стала наладжваць сувязі з КНДР пасьля пачатку ўварваньня ва Ўкраіну. У верасьні 2023 году паўночнакарэйскі лідэр Кім Чэн Ын пабываў зь візытам у Расею, а ў чэрвені 2024-га візыт у адказ нанёс Уладзімір Пуцін.
Афіцыйна ўлады дзьвюх краін паведамлялі, што на сустрэчах абмяркоўвалася ўзаемнае эканамічнае супрацоўніцтва, і адмаўлялі пастаўкі зброі КНДР у Расею.
ГЛЯДЗІЦЕ ТАКСАМА: ЗША ўхвалілі стратэгію ядзернага стрымліваньня Кітая, Расеі і Паўночнай КарэіУ лютым амэрыканскія расьсьледнікі, прааналізаваўшы сотні спадарожнікавых здымкаў партоў і чыгуначных станцый рэгіёну, высьветлілі, што са жніўня 2023 году КНДР магла паставіць Расеі больш за 2,5 мільёна боепрыпасаў.
Генпракуратура Ўкраіны ўжо зафіксавала выкарыстаньне Расеяй паўночнакарэйскіх ракет у абстрэлах украінскіх тэрыторый. Найбольш масавую атаку ракетамі, пастаўленымі з КНДР, паводле зьвестак украінскага боку, Расея правяла 7 лютага 2024 году.
Газэта The New York Times паведаміла, што Расея ў абмен на боепрыпасы дазволіла КНДР атрымаць доступ да сусьветнай фінансавай сыстэмы, а таксама разблякавала частку паўночнакарэйскіх актываў, якія трапілі пад санкцыі ААН.
У парушэньні забароны на вайсковае супрацоўніцтва з КНДР Расею абвінавацілі таксама сем сяброў Рады Бясьпекі ААН.
ГЛЯДЗІЦЕ ТАКСАМА: «На траіх». Чым Лукашэнку вабіць паўночнакарэйская дыктатураВайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- 17 лістапада Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.