Сьпікер Вайскова-марскіх сіл (ВМС) Украіны Дзьмітро Плецянчук у эфіры ўкраінскай службы Радыё Свабода пацьвердзіў атаку на порт «Каўказ» і зьнішчэньне расейскага чыгуначнага парома «Конра Трэйдэр».
«Гэтую цэль зьнішчылі Вайскова-марскія сілы. Гэты паром зьяўляўся адным з важных зьвёнаў ланцуга расейскай вайсковай лягістыкі для забесьпячэньня акупацыйных войскаў, у першую чаргу гаруча-змазачнымі матэрыяламі, але, апроч гэтага, ён перавозіў, вядома, і ўзбраеньне. Таму гэта цалкам легітымная цэль. І, адпаведна, гэта павінна зьменшыць магчымасьці нашага ворага на тых лякацыях, дзе яны вядуць актыўныя баявыя дзеяньні», — сказаў Дзьмітро Плецянчук.
Спадарожнікавы здымак порта Каўказ у Керчанскім праліве, зроблены Planet Labs 23 жніўня 2024 года. На фота - наступствы атакі Узброеных Украіны. Графіка ўкраінскай службы Радыё Свабода
У той жа час ён не ўдакладніў, якімі боепрыпасамі ці сродкамі нанесьлі гэты ўдар па расейскім порце.
«Паром патануў. То бок работа гэтай часткі порту фактычна заблякаваная. У іх застаецца яшчэ адна плятформа для пагрузкі на паром вагонаў. Аднак паромаў няма. Вось у чым праблема. Так, нездарма адразу мясцовыя жыхары ў акупаваным Крыме імгненна адрэагавалі масавымі заездамі на АЗС», — дадаў сьпікер ВМС Украіны.
З пачатку 2024 году пад удар дронаў у Расеі трапіў шэраг прадпрыемстваў нафтавага сэктару. У выніку на некаторых НПЗ спынілі працу ўстаноўкі першаснай перапрацоўкі нафты. Паводле інфармацыі Reuters, у першым квартале году свае магутасьці спынілі сама меней сем расейскіх заводаў.
Прэзыдэнт Украіны Ўладзімір Зяленскі называў атакі на НПЗ Расіі адказам на ўдары расейскіх войскаў па энэргетыцы Ўкраіны.
Што папярэдічала
Губэрнатар Краснадарскага краю Веньямін Кандрацьеў заявіў, што ў выніку атакі ўкраінскіх сіл у порце «Каўказ» патануў чыгуначны паром, які перавозіў паліва.
«У выніку пацэльваньня і пажару судна патанула. Чатырох чалавек экіпажу, якія апынуліся за бартом, выратавалі. Цяпер галоўная задача — выратаваць рэшту каманды і апэратыўна выканаць вычарпальныя захады для ліквідацыі наступстваў, каб не дапусьціць экалягічнай шкоды акваторыі мора», — напісаў Веньямін Кандрацьеў у сваім Telegram-канале.
Паводле яго, ужо ўсталявалі бонавыя загароды, каб перашкодзіць распаўсюджаньню паліва, а паверхню ваду апрацавалі сарбэнтам. Выратавалі 17 чальцоў экіпажу, яшчэ двух працягваюць шукаць.
ГЛЯДЗІЦЕ ТАКСАМА: У расейскім порце «Каўказ» у Краснадарскім краі пасьля ракетнага ўдару затануў паром з палівамВайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- 17 лістапада Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.