У паведамленьні адзначаецца, што Луцкіна неабгрунтавана ўтрымлівалася пад вартай з 2020 году і была вызваленая пасьля памілаваньня.
У арганізацыі падкрэсьлілі, што Луцкіна «не павінна была правесьці ў турме ніводнага дня».
На думку міжнароднай журналісцкай арганізацыі, усе калегі Луцкіной, якія ўтрымліваюцца ў няволі, таксама «павінны быць вызваленыя».
#Belarus: RSF is relieved by the release yesterday of journalist Ksenia Lutskina, unjustly detained since 2020, after a “presidential pardon”. She should never have spent a single day in prison, and her 40 colleagues must all be released! https://t.co/8Bu4lU7DmM pic.twitter.com/Xk9qvbmu1X
— RSF (@RSF_inter) August 21, 2024
Паводле інфармацыі БАЖ, у месцах няволі на 21 жніўня знаходзіцца 36 супрацоўнікаў беларускіх мэдыя.
Былую журналістку Белтэлерадыёкампаніі Ксенію Луцкіну затрымалі 22 сьнежня 2020 году і ў верасьні 2022 году асудзілі на 8 гадоў калёніі. У зьняволеньні ў яе пачаліся моцныя праблемы са здароўем — у яе расьце пухліна ў галаўным мозгу. Увесну яна за кратамі перахварэла на пнэўманію. Дома журналістку чакаў непаўналетні сын.
- 16 жніўня Лукашэнка падпісаў указ аб памілаваньні 30 палітзьняволеных, сярод якіх 14 жанчын і 16 мужчын, некаторыя зь іх маюць сур’ёзныя захворваньні. У апошнія дні з калёній праз памілаваньне пачалі выходзіць палітзьняволеныя.
- На сёньня абнародавана 10 імёнаў вызваленых палітвязьняў.
- Вядома, што палітвязьняў прымушаюць пісаць прашэньні аб памілаваньні, караюць за адмову. Праўладны палітоляг Юры Васкрасенскі, які раней уваходзіў у каманду Віктара Бабарыкі, называў лічбу ў 900 прашэньняў аб памілаваньні. Пра гэтым з турмаў прыходзілі зьвесткі, што палітвязьняў прымушаюць пісаць прашэньні на імя Лукашэнкі, а за адмову караюць, у тым ліку адпраўляюць у ШЫЗА і карцары.
- 3 ліпеня выйшлі на волю 18 палітзьняволеных. Сярод іх — чатыры жанчыны і 14 мужчын, у тым ліку асуджаны на 10 гадоў калёніі і хворы на анкалёгію Рыгор Кастусёў.