Лідэрка дэмакратычнага руху Беларусі ў выгнаньні Сьвятлана Ціханоўская заклікала заходніх лідэраў быць «салідарнымі» і «рашучымі» ў супрацьстаяньні «імпэрыялістычным амбіцыям Расеі».
У размове з Радыё Свабода ў кулюарах саміту NATO ў Вашынгтоне Ціханоўская заявіла, што народ Украіны змагаецца ня толькі за ўласную краіну, але і «за каштоўнасьці, на якіх грунтуюцца дэмакратычныя краіны».
«Паверце мне, калі мы дазволім Украіне прайграць гэтую вайну, дэмакратычны сьвет — магутная Эўропа або ЗША — стануць наступнымі, хто падвергнецца нападу дыктатуры», — сказала яна.
«Лёсы Беларусі і Ўкраіны пераплеценыя», — сказала яна Радыё Свабода:
«Мы рашуча заклікаем краіны NATO падтрымаць украінцаў і даць Украіне ўсё неабходнае для перамогі ў гэтай вайне. Але Беларусь не абмінуць».
Ціханоўская заявіла, што такія «дыктатары», як Лукашэнка і кіраўнік Расеі Ўладзімір Пуцін, успрымаюць млявасьць і нерашучасьць Захаду як «слабасьць».
«І яны думаюць, што могуць перасякаць чырвоную лінію за чырвонай лініяй», — сказала яна, дадаўшы, што яны кідаюць выклік заходняму сьвету, каб убачыць, як далёка яны могуць зайсьці, перш чым будзе адказ.
«Таму ўсе магчымыя танкі і тэхніка для Ўкраіны павінны былі быць там яшчэ ўчора, — сказала яна. — У нас няма часу».
«Я чакаю адзінства і рашучасьці краін NATO, таму што гэтага чакаюць людзі, якія змагаюцца супраць тыраніі, супраць імпэрыялістычных амбіцый Расеі, супраць дыктатараў сьвету», — сказала Ціханоўская.
У траўні 2024 году Сьвятлана Ціханоўская сустрэлася з кіраўніцтвам NATO і выступіла перад Паўночнаатлянтычнай радай у Бруселі.
Падчас візыту ў Вашынгтон Сьвятлана Ціханоўская выступіла на шэрагу імпрэз, расказала пра бягучую сытуацыю ў Беларусі, гібрыдныя атакі рэжыму Лукашэнкі супраць Польшчы, Літвы і Латвіі, разьмяшчэньне ядзернай зброі і магчымыя сцэнары разьвіцьця падзеяў, паведаміла яе прэсавая служба.
Ціханоўская ўжо правяла некалькі сустрэч у Вашынгтоне. Сярод іншага яна сустрэлася з сэнатаркай Джын Шагін, якая зьяўляецца лідэркай беларускага кокусу ў Сэнаце, актыўна выступае за вызваленьне палітвязьняў, у падтрымку мэдыя і грамадзянскай супольнасьці.
Святлана Ціханоўская таксама пагутарыла з канадзкай міністаркай замежных спраў Мэляні Жалі.
ГЛЯДЗІЦЕ ТАКСАМА: Ціханоўская бярэ ўдзел у імпрэзах да саміту NATO ў ВашынгтонеХто такая Сьвятлана Ціханоўская
Сьвятлана Ціханоўская — беларускі палітык, былая кандыдатка ў прэзыдэнты Беларусі. Цяпер знаходзіцца ў Літве.
Сьвятлана Ціханоўская
- Сьвятлана Ціханоўская нарадзілася ў 1982 годзе ў Мікашэвічах (Берасьцейская вобласьць).
- 15 траўня 2020 году пасьля адмовы Цэнтральнай выбарчай камісіі зарэгістраваць мужа Сьвятланы, зьняволенага лідэра кампаніі «Страна для жизни» блогера Сяргея Ціханоўскага, Сьвятлана ад свайго імя падала дакумэнты на рэгістрацыю ініцыятыўнай групы. 20 траўня яе групу зарэгістравалі. 29 траўня кіраўніка яе выбарчага штабу Сяргея арыштавалі зноў.
- Кандыдаткай у прэзыдэнты Ціханоўскую зарэгістравалі 14 ліпеня 2020.
- Пасьля арышту прэтэндэнта на пасаду прэзыдэнта Віктара Бабарыкі і ўцёкаў за мяжу яшчэ аднаго прэтэндэнта Валера Цапкалы іх штабы аб’ядналіся з штабам Сьвятланы Ціханоўскай. Аб’яднаны штаб правёў пасьпяховую выбарчую кампанію з шматтысячнымі мітынгамі ў вялікіх і малых гарадах Беларусі пад бел-чырвона-белымі сьцягамі.
- Паводле афіцыйных зьвестак ЦВК, на выбарах Сьвятлана Ціханоўская набрала 10,09%, а Аляксандар Лукашэнка — 80,08%. Ціханоўская адмовілася прызнаць гэтыя вынікі і 10 жніўня асабіста накіравалася ў ЦВК, каб іх абскардзіць.
- З ЦВК палітык не вярнулася. Сувязь зь ёю зьнікла, празь некалькі гадзін у вэстыбюлі ЦВК яна паведаміла, што «прыняла рашэньне» і зьехала ў невядомым кірунку. 11 жніўня стала вядома, што яна ў Літве. Былі апублікаваныя два відэазвароты Ціханоўскай, адзін зь якіх быў запісаны ў ЦВК пасьля размовы з двума высокапастаўленымі сілавікамі, у ім Ціханоўская заклікае дэманстрантаў не выходзіць на вуліцы. Кіраўніцтва Літвы 11 жніўня заявіла, што звароты Ціханоўская запісала пад ціскам і шантажом.
- Празь некалькі дзён пасьля фактычнай «дэпартацыі» ў Літву Сьвятлана Ціханоўская заявіла, што бярэ на сябе ролю «нацыянальнага лідэра».
- 18 жніўня з ініцыятывы Сьвятланы Ціханоўскай у Беларусі была створаная Каардынацыйная рада для транзыту ўлады.
- 10 верасьня 2020 Сэйм Літвы прагаласаваў за прызнаньне Сьвятланы Ціханоўскай абраным кіраўніком Беларусі.
- Ад верасьня 2020 году Ціханоўская наведала з працоўнымі візытамі дзясяткі краін сьвету і сустрэлася зь іх лідэрамі. Сярод іх прэзыдэнт Францыі Эманюэль Макрон, канцлер Нямеччыны Ангела Мэркель, высокі прадстаўнік ЭЗ Жузэп Бурэль, прэзыдэнт ЗША Джо Байдэн ды інш.
- Сьвятлана Ціханоўская кантактавала з актыўнымі людзьмі ў Беларусі падчас пратэстаў 2020 і 2021 гадоў, прызначыла сваіх прадстаўнікоў для падтрыманьня лучнасьці з сацыяльнымі і прафэсійнымі групамі ў краіне.
- Ціханоўская выступіла за правядзеньне ў Беларусі новых празрыстых прэзыдэнцкіх выбараў пры міжнародным кантролі і актыўна заклікала міжнародную супольнасьць да ўдзелу ў арганізацыі перамоваў зь цяперашнім кіраўніцтвам Беларусі.
- За два гады Ціханоўская, яе штаб і зьвязаныя з ёй ініцыятывы дапамагалі палітвязьням, выступалі з шэрагам гуманітарных і палітычных ініцыятываў.
- Яна выступала супраць сфальшаванага канстытуцыйнага рэфэрэндуму, ініцыяванага Лукашэнкам у 2022 годзе.
- У лютым 2022 Ціханоўская асудзіла расейскую агрэсію супраць Украіны і саўдзел у ёй рэжыму А. Лукашэнкі, у сакавіку 2022 году стварыла беларускі Антываенны рух.
- У красавіку 2022 году Ціханоўская на канфэрэнцыі Рады Бясьпекі ААН заявіла, што «поўдзень Беларусі фактычна знаходзіцца пад расейскай акупацыяй».
- Ціханоўская правяла пасьпяховыя перамовы з урадам Польшчы і дамаглася асаблівых умоваў для прыезду і легалізацыі беларусаў, ня згодных з рэжымам Лукашэнкі.
- У жніўні 2022 году Сьвятлана Ціханоўская стварыла Аб’яднаны пераходны кабінэт, назвала чатырох сваіх прадстаўнікоў.
- У лістападзе 2022 Ціханоўская ўпершыню назвала сябе прэзыдэнтам-электам