Вайсковы штурмавік Су-25 пацярпеў крушэньне недалёка ад вайсковай базы ў населеным пункце Дысвэлі Болніскага муніцыпалітэту Грузіі.
Як паведаміла грузінская служба Радыё Свабода з спасылкай на прадстаўніка мэра Болніскага муніцыпалітэту Дзьмітрыя Мадэбадзэ, пілёт ня змог катапультавацца і загінуў.
Трагічны інцыдэнт адбыўся ў часе плянавых вайсковых вучэньняў з удзелам авіяцыі. У Міністэрстве абароны Грузіі ўдакладнілі, што загінуў пілёт Сіл абароны Кахабэр Зурабашвілі.
«Для высьвятленьня прычын інцыдэнту адпаведныя службы Мінабароны праводзяць дэталёвае расьсьледаваньне», — паведамілі ў вайсковым ведамстве Грузіі.
Раней у Міністэрстве абароны Грузіі паведамлялі аб мадэрнізацыі і абнаўленьні самалётаў Су-25. Работы выконвалі спэцыялісты навукова-тэхнічнага цэнтру «Дэльта» і кампаніі «Тбілавіямшэні».
ГЛЯДЗІЦЕ ТАКСАМА: У Севастопалі ўпаў у мора расейскі зьнішчальнік Су-35