Распродаж кніг у піжамах і бусьлянка ў незвычайным месцы. Добрыя навіны тыдня

Качаняты вылупіліся

У качкі, якая выседжвала яйкі на клюмбе ў цэнтры Менску, вылупіліся птушаняты. Яна ўжо плавае з качанятамі па Сьвіслачы, паведаміла выданьне «Минск-Новости».

У мінулым выпуску добрых навінаў мы пісалі, што качка ўладкавалася выседжваць яйкі на высокай клюмбе побач з паркам Горкага ў Менску. Супрацоўнікі банку, які месьціцца паблізу, паклапаціліся пра птушку: абнесьлі месца сыгнальнай стужкай, прыносілі качцы корм.

Беларусы запісалі сумесны рэп з розных бакоў мяжы

Hip-hop-артысты Віталь Рыжкоў aka Angst і Лёша Грызунт aka лайтовы прэзэнтавалі сумесны трэк «Люстэрка». Музыкі знаходзяцца па два бакі мяжы: Віталь у Беларусі, Лёша — у Польшчы. Трэк прапануе асэнсаваць, што сёньня адбываецца зь беларусамі «там» і «тут». Ініцыятарам сумеснага запісу стаў Віталь. Ён запісаў сваю частку і адправіў яе Грызунту. Той падтрымаў ініцыятыву. Лейтматывам у трэку гучыць пытаньне «Дзе мой край?».

«Веру, аднойчы мы зможам сабрацца напрасткі. І не каб крычаць з адваротнага берага, бо калі мы і па два бакі, то па два бакі аднаго люстэрка», — сьпявае Грызунт.

Паслухаць трэк можна тут.

Буслы зьвілі гняздо на пад’ёмным кране

Бусьлянка ў незвычайным месцы зьявілася ў Століне Берасьцейскай вобласьці. Там птушкі зрабілі сабе гняздо на самым краі стралы пад’ёмнага крана, які паставілі на тэрыторыі прадпрыемства як дэкарацыю. Відэа з бусьлянкай апублікавалі ў TikTok з подпісам «Мая Беларусь».

Бусел. Ілюстрацыйнае фота

Кнігі ў піжамах

У ноч на чацьвер 27 чэрвеня ў Менску зладзілі начны распродаж кніг. Крама Oz побач зь Нямігай працавала зь 9-й гадзіны вечара да 4-й гадзіны ранку. Там прайшоў распродаж бэстсэлераў і навінак са зьніжкамі да 40%. Наведнікаў абяцаліся частаваць кавай, а тым, хто прыйдзе ў піжаме, падарыць кнігу. Арганізатары начнога распродажу абвяшчалі, што і гандляры будуць працаваць у хатнім адзеньні.

Выданьне Kyky апублікавала відэа з начнога распродажу, дзе відаць сама меней дзясяткі чалавек, якія стаяць на вуліцы ў чарзе.

Беларускія кнігі на кірмашы. Ілюстрацыйнае архіўнае фота

Эвакуавалі Алесю Буневіч

Палітзьняволеную беларуску, якая адбыла тэрмін, вывезьлі зь Беларусі дзякуючы службе эвакуацыі фонду BySol. Пра гэта стала вядома 26 чэрвеня.

Алеся Буневіч з 2021 году жыла ў Вільні. Працавала дырэктаркай друкарні. Пры гэтым яна рэгулярна езьдзіла на радзіму. Алесю затрымалі ў красавіку 2022 году, калі яна паехала на ўгодкі сьмерці маці. Спачатку яе вінавацілі ў межах справы «рэйкавых партызанаў», а пасьля судзілі за нібыта незаконны пераход мяжы. Буневіч далі 3,5 года калёніі, аднак падчас апэляцыі паменшылі тэрмін на год.

Алеся Буневіч з мужам Алегам Мяцеліцам і сынам Кастусём. Архіўнае фота

У Вільні яе чакалі муж і сын. Сёлета ў траўні Алеся вызвалілася з калёніі. Цяпер яна ўзьядналася зь сям’ёй.