Як стала вядома Свабодзе, адзін з абвінавачаных, Васіль Прохараў, атрымаў 11 гадоў калёніі. Ягоная жонка Ларыса і сын Павал атрымалі па 8 гадоў зьняволеньня. Яшчэ аднаму фігуранту справы, настаўніку беларускай мовы Руслану Прахарэнку, прысудзілі 10 гадоў калёніі. Пра лёс пятага фігуранта справы, Фёдара Аксёненка, нічога не вядома.
Ларыса, Васіль і Павал Прохаравы. Каляж
Удзельнікі закрытага працэсу маюць падпіскі аб невыдаваньні. Зь неафіцыйнай крыніцы Свабодзе вядома, што крымінальная справа тычыцца фатаграфаваньня розных аб’ектаў на тэрыторыі Беларусі, а за фігурантамі справы нейкі час перад арыштам сачылі спэцслужбы.
Групу абвінавачвалі паводле артыкулаў «Здрада дзяржаве» (ч. 1 арт. 356 КК), «Распальваньне варожасьці» (ч. 1 арт. 130 КК) «Садзейнічаньне экстрэмісцкай дзейнасьці» (ч. 1 арт. 361-4 КК) і «Неданясеньне пра злачынства» (ч. 1 арт. 406 КК).
Сям’я Прохаравых доўгі час жыла ў вёсцы Грабаўка Гомельскага раёну. На момант затрыманьня яны жылі ў вёсцы Ўза Гомельскага раёну, куды пераехалі два гады таму.
ГЛЯДЗІЦЕ ТАКСАМА: Удзел у патрыятычных мерапрыемствах, сяброўства з рускаміраўцам, цяпер — «здрада дзяржаве». Што вядома пра фігурантаў новай гучнай справыСтарэйшы Прохараў, Васіль Васілевіч, этнічны ўкраінец 1969 году нараджэньня, былы дэсантнік. Ён нарадзіўся ў Чарнобылі (Кіеўская вобласьць). Васіль Прохараў часта езьдзіў зь Беларусі ва Ўкраіну. У 2021 годзе на яго не было пачатых крымінальных спраў. Працаваў у асноўным у сфэры будаўніцтва, прарабам і майстрам.
Апроч працы, Васіль меў свой блог на YouTube. Там ён дзяліўся з падпісчыкамі відэа пра вёскі і пасёлкі Гомельскай вобласьці, у тым ліку чарнобыльскай зоны. Частка відэа прысьвечана сьвяткаваньню Дня дэсантніка ў розныя гады.
Жонка Васіля Ларыса Прохарава — беларуска 1975 году нараджэньня. Паходзіць з Грабаўкі Гомельскага раёну, жыла там доўгі час. Раней працавала санітаркай у адной з гомельскіх лякарняў.
Сын Прохаравых Павал нарадзіўся ў 1996 годзе. З 2007-га па 2019 год сем разоў быў за мяжой — ва Ўкраіне і Польшчы. Ён скончыў Беларускі дзяржаўны ўнівэрсытэт транспарту, працаваў у будаўнічым трэсьце. У сьнежні 2023 году паведамлялася, што была затрыманая і дачка Прохаравых Анастасія, але яе няма сярод абвінавачаных.
Руслан Прахарэнка працаваў настаўнікам беларускай мовы і літаратуры ў Нароўлі. Туды ён трапіў па разьмеркаваньні, калі скончыў Гомельскі дзяржаўны ўнівэрсытэт імя Францішка Скарыны. Хлопцу 24 гады. Свае сацыяльныя сеткі ён вёў на беларускай мове, часам выказваўся на палітычныя тэмы і рабіў перапосты з так званых «экстрэмісцкіх» каналаў. Таксама пісаў пра тое, чаму варта размаўляць па-беларуску.
Фёдар Аксёненка нарадзіўся ў 1978 годзе Лунінецкім раёне, вучыўся ў тэхнічным унівэрсытэце ў Гомлі, там жа застаўся жыць і працаваць. Ён мае багатую біяграфію — працаваў кіроўцам, будаўніком, дырэктарам розных камэрцыйных фірмаў. Ня менш за 17 разоў прыцягваўся да адміністрацыйнай адказнасьці па лініі ДАІ. У 2001 годзе яго судзілі паводле крымінальнага артыкулу 339 за хуліганства.
Санкцыі артыкулу «Здрада дзяржаве» — ад 7 да 15 гадоў пазбаўленьня волі. На люты 2024 году праваабаронцы «Вясны» налічылі мінімум 55 чалавек, якія сталі «здраднікамі дзяржавы» паводле вэрсіі сьледзтва і суду.