«34 міжнародныя назіральнікі будуць сачыць за ходам галасаваньня на выбарах у парлямэнт рэспублікі. Гэта дэлегацыі зь Беларусі, Турцыі, Вугоршчыны і нашыя калегі з Расейскай Фэдэрацыі», — паведаміла агенцтву ТАСС кіраўніца Цэнтарвыбаркаму самаабвешчанай Паўднёвай Асэтыі Эмілія Гагіева.
Парлямэнцкія выбары ў не прызнаным міжнароднай супольнасьцю сэпаратысцкім утварэньні на тэрыторыі Грузіі праходзяць 9 чэрвеня.
Беларускія дзяржаўныя органы аб удзеле сваіх прадстаўнікоў у мерапрыемстве не паведамляюць, адзначае «Позірк».
У жніўні мінулага году дзяржаўны дарадца кіраўніка Паўднёвай Асэтыі Вячаслаў Габозаў у інтэрвію РІА «Новости» заяўляў, што рэспубліка хоча ўступіць у так званую «Саюзную дзяржаву» Беларусі і Расеі, таму ёй трэба прызнаньне незалежнасьці з боку афіцыйнага Менску.
ГЛЯДЗІЦЕ ТАКСАМА: Прэм’ер Грузіі выказаў надзею на вяртаньне Абхазіі і Паўднёвай Асэтыі да 2030 годуУ пачатку ліпеня мінулага года стала вядома, што тэма магчымага прызнаньня Беларусьсю незалежнасьці Паўднёвай Асэтыі абмяркоўвалася на паседжаньні парлямэнту часткова прызнанай рэспублікі.
Паўднёвая Асэтыя — самаабвешчаная дзяржава на тэрыторыі Грузіі. Яе незалежнасьць прызналі Расея, Нікарагуа, Вэнэсуэла, Науру і Сырыя. Беларусь юрыдычна не прызнала незалежнасьць Паўднёвай Асэтыі.