Хроніка перасьледу 6 чэрвеня: за абразу Лукашэнкі асудзілі пэнсіянэрку зь Ліды і палітвязьня з Воршы

Аршанца паўторна асудзілі за абразу Аляксандра Лукашэнкі

У судзе Аршанскага раёну і Воршы 4 чэрвеня разгледзелі крымінальную справу палітвязьня Сяргея Гняўко. Яго абвінавацілі ў абразе Аляксандра Лукашэнкі (ч.2 арт. 368 Крымінальнага кодэксу), прычым паўторна. Справу разглядала судзьдзя Юлія Вяршыніна, паведамляе «Вясна».

Першы раз Сяргея Гняўко асудзілі па гэтым жа артыкуле (ч. 1 арт. 368 КК) у судзе Кастрычніцкага раёну Менску 5 траўня. Прысуд праваабаронцам невядомы, аднак у большасьці выпадкаў за абразу Лукашэнкі людзей пазбаўляюць волі.

Паводле выраку суду, Сяргей Гняўко, ужо раней судзімы за публічную абразу Лукашэнкі, падчас дастаўкі ў ізалятар Аршанскага РУУС за дробнае хуліганства (арт. 19. 1 КаАП), публічна выказаўся ў адрас Аляксандра Лукашэнкі з ужываньнем «ненарматыўнай формы маўленчага выказваньня».

Суд прызнаў яго вінаватым і прысудзіў яму 4 гады пазбаўленьня волі. Па сукупнасьці прысудаў (да прызначанага раней пакараньня суд часткова далучыў неадбытае пакараньне паводле папярэдняга прысуду) яму канчаткова прызначылі пакараньне ў выглядзе 4 гадоў 6 месяцаў калёніі агульнага рэжыму.

Сілавікі апублікавалі відэа са сьпеваком Сашам Нэмам

На відэа сілавікоў беларускі сьпявак Саша Нэма «просіць прабачэньня» за тое, што ў 2020 годзе ўдзельнічаў у пасьлявыбарных акцыях пратэсту, заўважыла «Вясна».

ГУБАЗіК сьцьвярджае, што сьпявак сам прыйшоў да іх, але ніякіх доказаў гэтаму не прыводзіцца і пра гэта ня кажа сам Нэма.

Пазней прапагандысты апублікавалі яшчэ адно відэа, на якім сьпявак з аўтамабіля кажа, што ў яго «ўсё добра», а таксама што ён «быў у ГУБАЗ» і «гэта была вельмі складаная размова з паказаньнямі».

Пэнсіянэрку зь Ліды асудзілі за абразу Лукашэнкі

У судзе Лідзкага раён4 вынесьлі прысуд пэнсіянэрцы з пасёлку Бердаўка Тацяне Чэкель, якую абвінавацілі ў абразе Аляксандра Лукашэнкі паводле ч. 1 арт. 368 Крымінальнага кодэксу. Справу разглядаў судзьдзя Аляксандар Мішураў, паведамляе «Вясна».

Да суду жанчына была пад падпіскай аб нявыезьдзе.

Паводле матэрыялаў сьледзтва, Тацяна Чэкель нібыта «наўмысна і публічна выказала фразу, якая зьмяшчае нэгатыўную ацэнку Аляксандра Лукашэнкі ў непрыстойнай абразьлівай форме».

У прысутнасьці міліцэйскага патруля, які выклікала пэнсіянэрка, у якой прапаў мабільны тэлефон, жанчына абражала Лукашэнку.

Суд прызнаў пэнсіянэрку вінаватай і прызначыў ёй 2 гады абмежаваньня волі без накіраваньня ў папраўчую ўстанову, так званую «хатнюю хімію».

У Менску мужчыну судзяць за данаты — яму пагражае да 12 гадоў калёніі

У Менскім гарадзкім судзе 6 чэрвеня распачынаецца чарговы суд за данаты над Анатолем Валадзько, паведамляе «Вясна».

Яго абвінавачваюць паводле ч. 1 арт. 290-1 («Фінансаваньне тэрарыстычнай дзейнасьці») і арт. 361-2 («Фінансаваньне дзейнасьці экстрэмісцкага фармаваньня») Крымінальнага кодэксу. Сутнасьць абвінавачаньня праваабаронцам не вядомая. Мужчыну пагражае да 12 гадоў зьняволеньня.

Справу будзе разглядаць Алена Ананіч.

Паводле інфармацыі «Нашай нівы», Анатолю Валадзько 56 гадоў і ён IT-спэцыяліст.