БДУ страціў амаль 100 пазыцый у рэйтынгу ўнівэрсытэтаў сьвету за апошнія тры гады

Беларускі дзяржаўны ўнівэрсытэт у рэйтынгу QS World University за апошнія тры гады страціў амаль 100 пазыцый і спусьціўся з 288-га месца ў 2022 годзе на 387-е ў 2024-м.

У 2018 годзе БДУ займаў 354-е месца.

Беларускі нацыянальны тэхнічны ўнівэрсытэт (БНТУ) увайшоў у рэйтынг навучальных устаноў, якія знаходзіцца на 801–850 месцах, а Беларускі дзяржаўны ўнівэрсытэт інфарматыкі і радыёэлектронікі — у прамежак 1201–1400.

Беларускі дзяржаўны мэдычны ўнівэрсытэт увогуле ня трапіў у рэйтынг, хоць у 2017 годзе ён займаў 772-е месца.

У рэйтынг уключана 1500 навучальных устаноў з 105 краін сьвету.

ЗША зьяўляюцца найбольш прадстаўленай краінай з 197 рэйтынгавымі ўстановамі, потым ідуць Вялікая Брытанія (90 навучальных устаноў) і Кітай (71).

Трынаццаты год запар рэйтынг ачольвае Масачусэцкі тэхналягічны інстытут, на другім месцы — Імпэрскі каледж Лёндана, трэцяе і чацьвёртае месцы займаюць Оксфардзкі і Гарвардзкі ўнівэрсытэты адпаведна. На пятым месцы — Кембрыдзкі ўнівэрсытэт.

Крытэры, паводле якіх адбіраюць унівэрсытэты:

• Акадэмічная рэпутацыя. На яе долю, якая складае 40% ад агульнага бала, залежыць якасьць выкладаньня і дасьледаваньняў ва ўнівэрсытэтах сьвету. Стваральнікі рэйтынгу зьбіраюць больш за 130 000 экспэртных думак з прасторы вышэйшай адукацыі, ствараючы найбуйнейшае апытаньне навуковых думак у сьвеце;
• Рэпутацыя працадаўцы. Студэнты хочуць скончыць навучаньне з навыкамі і ведамі, неабходнымі для рынку працы. Ацэньваецца, як навучальныя ўстановы рыхтуюць студэнтаў да пасьпяховай кар’еры і якія ўстановы забясьпечваюць найбольш кампэтэнтных, інавацыйных і эфэктыўных выпускнікоў;
• Суадносіны выкладчыкаў і студэнтаў — паказчык, які сьведчыць аб тым, што вялікая колькасьць навукоўцаў на аднаго студэнта зьніжае нагрузку на навучаньне і стварае больш спрыяльны досьвед для студэнтаў. Ацэньваецца, як установы забясьпечваюць студэнтам доступ да выкладчыкаў і рэпэтытараў;
• Колькасьць цытаваньняў на выкладчыкаў. Вымяраецца якасьць унівэрсытэцкіх дасьледаваньняў паводле паказчыка цытаваньня на факультэт, прымаючы агульную колькасьць навуковых цытаваньняў у працах, падрыхтаваных унівэрсытэтам за пяцігадовы пэрыяд;
• Каэфіцыент міжнародных студэнтаў і міжнародных выкладчыкаў. Унівэрсытэт з высокім міжнародным узроўнем стварае шэраг пераваг. Гэта дэманструе здольнасьць прыцягваць якасных студэнтаў і супрацоўнікаў з усяго сьвету, і гэта мае на ўвазе вельмі глябальны погляд. Моцныя міжнародныя інстытуты забясьпечваюць шматнацыянальнае асяродзьдзе, ствараючы міжнародныя сымпатыі і глябальную дасьведчанасьць.

У 2022 годзе сяброўства Беларусі ў Балёнскім працэсе прыпынілі. Маніторынг паказаў, што Беларусь не набліжаецца да выкананьня балёнскіх прынцыпаў, але спрабуе гэтае набліжэньне імітаваць, а кожны раз, калі элемэнты Балёнскага працэсу ўводзіліся ў беларускую сыстэму адукацыі, яны фармалізоўваліся.

Разам з тым паўнавартасна ў Балёнскі працэс Беларусь ніколі не ўваходзіла.