Беларускія зьняволеныя гатовыя шыць форму для паліцыянтаў Манголіі,

Падчас сустрэчы з намесьніцый міністра юстыцыі і ўнутраных справаў Манголіі Баярсайхан Солангоо кіраўнік МУС Беларусі Іван Кубракоў падкрэсьліў «патэнцыял для разьвіцьця ўзаемадзеяньня ў розных сфэрах, у тым ліку ў вырашэньні задачаў падтрыманьня міру, бясьпекі і правапарадку».

Пра гэта паведамляе прэс-служба ведамства.

Як паведамляецца, прадпрыемствы дэпартамэнту выкананьня пакараньняў МУС «гатовыя вырабіць для праваахоўнікаў Манголіі формавае адзеньне, абутак, спэцыяльны рыштунак».

«МУС Беларусі адкрытае для ўзаемадзеяньня ў шырокім спэктры пытаньняў», — заявіў Кубракоў.

Міністар унутраных справаў знаходзіцца ў Манголіі ў рамках дзяржаўнага візыту ў гэтую краіну Аляксандра Лукашэнкі. Візыт праходзіць 1–4 чэрвеня, паведамляе інфармацыйнае агенцтва «Позірк».

Былыя палітзьняволеныя, у асноўным жанчыны, пасьля вызваленьня ня раз паведамлялі, што ў беларускіх папраўчых установах наладжаная вытворчасьць формавага адзеньня для сілавых ведамстваў Беларусі.

ГЛЯДЗІЦЕ ТАКСАМА: Як мангольскія СМІ і прэсавыя службы дзяржаўных органаў адрэагавалі на прыезд Лукашэнкі

«Падзеі, якія адбываюцца ў сьвеце, пацьвярджаюць, што асаблівую ўвагу неабходна надаваць супрацьдзеяньню ўсім відам і формам злачыннасьці, супрацоўніцтву ў праваахоўных пытаньнях паміж краінамі. Пасьпяхова супрацьстаяць сучасным выклікам і пагрозам магчыма толькі разам», — сказаў Кубракоў у Манголіі.

МУС Беларусі, паводле яго, зацікаўленае ў разьвіцьці супрацоўніцтва з мангольскім праваахоўным ведамствам у шэрагу кірункаў: бясьпека дарожнага руху, паляпшэньне праўнага становішча грамадзян дзьвюх краін, устанаўленьне практычных кантактаў і абмен перадавым досьведам, у тым ліку ў навучаньні спэцыялістаў.

ГЛЯДЗІЦЕ ТАКСАМА: Шыюць форму сілавікам за 20 рублёў у месяц. Былая палітзьняволеная расказала, як працуюць у жаночай калёніі

Кубракоў таксама зьвярнуў увагу на «пэрспэктыўнасьць узаемадзеяньня ў маштабах міжнародных арганізацыяў, такіх як Нарада міністраў унутраных справаў і грамадзкай бясьпекі дзяржаў — членаў Шанхайскай арганізацыі супрацоўніцтва». У рамках гэтай арганізацыі, як сьцьвярджаецца, прымаюцца «эфэктыўныя захады для супрацьдзеяньня транснацыянальнай злачыннасьці і ўмацаваньня калектыўнай бясьпекі».

«Мы маем выпрацаваную сыстэму падрыхтоўкі замежных праваахоўнікаў і гатовыя аказаць усялякае спрыяньне ў навучаньні мангольскіх паліцыянтаў. Гэта можа быць арганізацыя кароткатэрміновых курсаў на базе Акадэміі МУС, павышэньне кваліфікацыі ў міжнародным навучальным цэнтры сталічнай міліцэйскай ВНУ», — дадаў кіраўнік ведамства.

ГЛЯДЗІЦЕ ТАКСАМА: «Сёньня я буду, як і заўсёды, гучна сьмяяцца». 10 фактаў пра Марыю Калесьнікаву на волі і за кратамі