МУС Расеі аб’явіла ў вышук прэзыдэнта Ўкраіны Зяленскага

МУС Расеі аб’явіла ў вышук прэзыдэнта Украіны Ўладзіміра Зяленскага. На гэтую інфармацыю ў базе даных зьвярнула ўвагу РІА «Новости».

Па якім крымінальным артыкуле расшукваецца Зяленскі і як даўно яго прозьвішча знаходзіцца ў базе вышуку, не ўдакладняецца. У красавіку 2022 году кіраўнік Сьледчага камітэту Расеі Аляксандар Бастрыкін даручыў праверыць словы Зяленскага, сказаныя ім у інтэрвію ВВС, аб «часовай падрыхтоўцы Ўкраіны да вайны з Расеяй». Аб выніках праверкі не паведамлялася.

У вышук таксама аб’яўлены былы прэзыдэнт Украіны, папярэднік Уладзіміра Зяленскага Пётар Парашэнка. Таксама расейскае МУС аб’явіла ў вышук камандуючага Сухапутнымі войскамі ЎСУ Аляксандра Паўлюка. Яны таксама, як указана ў базе, абвешчаныя ў вышук па крымінальным артыкуле, па якім менавіта, не ўдакладняецца. У адрозьненьне ад Зяленскага і Парашэнкі, аб завядзеньні крымінальнай справы ў дачыненьні да Паўлюка ў Расеі раней паведамлялася — Сьледчы камітэт абвінаваціў яго ў тым, што па яго загадзе ў 2022 годзе жыхароў Марыюпалю, абложанага расейскімі войскамі, нібыта выкарыстоўвалі як жывы шчыт.

ГЛЯДЗІЦЕ ТАКСАМА: ЗША прапанавалі вылучыць Украіне 50 мільярдаў даляраў за кошт прыбытку ад актываў Расеі

МЗС Украіны апублікаваў камэнтар у сувязі з паведамленьнем аб абвяшчэньні прэзыдэнта краіны ў вышук у Расеі. Яно названа «сьведчаньнем роспачы расейскай дзяржаўнай машыны і прапаганды, якія ня ведаюць, якую яшчэ навіновую нагоду прыдумаць для прыцягненьня ўвагі». Пры гэтым у камэнтары адзначаецца, што, «адрозьненьне ад нікчэмных расейскіх аб’яў», у дачыненьні да прэзыдэнта Расеі Ўладзіміра Пуціна (у паведамленьні ён названы «расейскім дыктатарам») быў выдадзены ордэр на арышт, які падлягае выкананьню ў 123 дзяржавах сьвету.

За апошнія некалькі месяцаў у Расеі аб’явілі ў вышук некалькі дзеючых і былых прадстаўнікоў улад Украіны. 3 траўня стала вядома аб тым, што ў базе дадзеных вышуку знаходзіцца кіраўнік Рады нацыянальнай бясьпекі і абароны Аляксандр Літвіненка.
У вышуку таксама знаходзяцца кіраўнік вайсковай разьведкі Мінабароны Ўкраіны Кірыл Буданаў, кіраўнік Службы бясьпекі Ўкраіны Васіль Малюк, былыя кіраўнікі СБУ Валянцін Налівайчанка і Васіль Грыцак.
У дачыненьні да прэзыдэнта Расеі Ўладзіміра Пуціна выдадзены ордэр на арышт Міжнародным крымінальным судом у Гаазе — у сувязі зь яго меркаванай роляй у незаконным вывазе дзяцей з Украіны ў Расею. Масква не прызнае правамоцнасьць рашэньняў Міжнароднага крымінальнага суду.

Вайна Расеі супраць Украіны

А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.