Радыё Свабода абвяшчае конкурс на журналісцкую стыпэндыю імя Вацлава Гавэла

Заяўкі на стыпэндыю прымаюцца да 1 чэрвеня 2024 году ад журналістаў з Армэніі, Азэрбайджану, Беларусі, Грузіі, Малдовы, Украіны і Расеі.

У выпадку Беларусі і Расеі заяўкі могуць падаваць толькі журналісты, якія цяпер пражываюць па-за межамі гэтых дзьвюх краінаў.

Мэта стыпэндыі — дапамагчы журналістам-пачаткоўцам з рэгіёну займацца сваёй прафэсіяй у рэчышчы плюралізму і незалежнасьці СМІ.

Стыпэндыятамі прэміі імя Вацлава Гавэла ад Беларусі раней былі Франак Вячорка, Ганна Любакова, Ігар Лосік, Вітаўт Сіўчык ды іншыя.

Стыпэндыя Вацлава Гавэла — сямімесячная праграма, якая дае стыпэндыятам глыбокія журналісцкія навыкі і ангажуе іх у штодзённыя рэдакцыйныя задачы і дыскусіі. Стыпэндыяты праводзяць паўгода ў штаб-кватэры Радыё Свабодная Эўропа/Радыё Свабода ў Празе, дзе яны знаходзяцца ў адпаведнай моўнай службе, каб атрымліваць штодзённае навучаньне без адрыву ад працы, а таксама мэнтарства з боку дасьведчаных прафэсіяналаў Радыё Свабода.

Пасьля Прагі стыпэндыяты праводзяць апошні месяц у мясцовым бюро Радыё Свабода (калі гэта магчыма).

Кандыдаты на стыпэндыю павінны:

• мець ня менш як два гады вопыту работы журналістам на роднай мове;
• мець намер працаваць у якасьці журналіста ў сваёй краіне або для аўдыторыі ў сваёй краіне;
• падзяляць місію Радыё Свабодная Эўропа/Радыё Свабода;
• валодаць ангельскай мовай.

Заяўка складаецца з аўтабіяграфіі (якая ўключае актуальную кантактную інфармацыю), асабістай заявы, трох узораў работ, двух рэкамэндацыйных лістоў і «Ліста да Вацлава Гавэла». У свой час Вацлаў Гавэл, знаходзячыся ў зьняволеньні, пісаў сваёй жонцы лісты. Пазьней яны былі выдадзеныя як кніга «Лісты да Вольгі». Матэрыялы заяўкі павінны быць прадстаўленыя на ангельскай мове.

Падрабязьней пра ўсе ўмовы стыпэндыі і патрабаваньні да заяўкі можна пачытаць тут.

Стыпэндыя імя Вацлава Гавэла, заснаваная ў 2011 годзе, натхнёная верай былога прэзыдэнта Чэхіі ў трансфармацыйную ролю журналістыкі ў барацьбе з тыраніяй і прыгнётам. Стыпэндыя абапіраецца на спадчыну Радыё Свабодная Эўропа/Радыё Свабода ў прасоўваньні адкрытасьці грамадзтваў праз журналістыку. Гэта сумесная ініцыятыва Міністэрства замежных справаў Чэхіі і Радыё Свабода, фінансуецца яна міністэрствам.