ЗША ўвялі санкцыі супраць Менскага завода колавых цягачоў за падтрымку ракетнай праграмы Пакістану

«ААТ „Менскі завод колавых цягачоў“ займаецца пастаўкай спэцыяльных аўтамабільных шасі для пакістанскай праграмы па стварэньні балістычных ракет вялікай далёкасьці», — гаворыцца ў паведамленьні Дзярждэпартамэнту ЗША.

Гэтыя шасі, паводле Дзярждэпартамэнту, Комплекс нацыянальнай абароны Пакістану выкарыстоўвае ў складзе пускавога абсталяваньня.

Акрамя Менскага завода колавых цягачоў, у амэрыканскі санкцыйны сьпіс трапілі тры кампаніі з Кітаю, іх абвінавачваюць у перадачы Пакістану ракетнага абсталяваньня.

Менскі завод колавых цягачоў з 2022 году знаходзіцца пад санкцыямі ЗША за падтрымку рэжымам Лукашэнкі расейскай інтэрвэнцыі ва Ўкраіну.

У спробе пераарыентавацца на рынкі ў тым ліку азіяцкіх дзяржаваў прадстаўнікі рэжыму Лукашэнкі ў 2023 годзе неаднойчы праводзілі перамовы з уладамі Пакістану.

У даведачным матэрыяле да 30-годзьдзя беларуска-пакістанскіх адносінаў, які ў лютым 2024 году выпусьціў Інстытут стратэгічных дасьледаваньняў у Ісламабадзе, гаворыцца, што «за першыя 5 месяцаў 2023 году ўзаемны гандаль вырас на 30%, а беларускі экспарт у Пакістан павялічыўся ў 1, 5 разоў у параўнаньні з папярэднім годам». У дакумэнце, сярод іншага, адзначаецца, што ў апошнія гады «назіраецца ўмацаваньне ваеннага супрацоўніцтва» паміж Беларусьсю і Пакістанам.