Ведамства паведаміла, што каля 6,5 тысячы вайсковаабавязаных былі прызваныя ў 19-ю асобную мэханізаваную брыгаду і 120-ю зэнітную ракетную брыгаду, і яны «вернуцца дадому» да 30 красавіка, а «тэхніка, якая прыцягваецца для праверкі, вернутая».
Памочнік міністра абароны ў ідэалягічнай працы Леанід Касінскі адзначыў, што «падводзіць вынікі праверкі боегатоўнасьці пакуль рана», але «ёсьць асаблівасьці, пра якія ўжо можам упэўнена гаварыць».
Паводле яго, «практыка прыцягненьня інструктараў, якія прайшлі падрыхтоўку ў Расеі, адназначна паказвае сваю эфэктыўнасьць».
«Дзякуючы таму, што ў нас ёсьць магчымасьць пераймаць сучасны баявы досьвед і ўкараняць яго ў сябе, мы фактычна робім якасны скачок ва ўзроўні падрыхтаванасьці асабовага складу», — сказаў Касінскі.
У ходзе праверкі боегатоўнасьці, дадаў ён, «войскі апрабавалі новыя спосабы прымяненьня ўзбраеньня, вайсковай і спэцыяльнай тэхнікі».
«Вялікая ўвага ў ходзе вучэньня ўдзялялася пытаньням адбіцьця сродкаў паветранага нападу, у тым ліку бесьпілётных лятальных апаратаў, павышэньню жывучасьці падразьдзяленьняў, процідзеяньню дывэрсійна-выведвальных груп. Нават самі вайсковаабавязаныя, якія праходзілі службу некаторы час таму, адзначаюць і заўважаюць, што беларускае войска сёньня кардынальна зьмяніла сваё аблічча», — падкрэсьліў ідэоляг Мінабароны.
Праверка боегатоўнасьці злучэньняў і вайсковых частак праходзіла з 11 сакавіка.
ГЛЯДЗІЦЕ ТАКСАМА: У Беларусі ў чатырох абласьцях пачаўся ключавы этап праверкі боегатоўнасьці ГЛЯДЗІЦЕ ТАКСАМА: У рамках праверкі боегатоўнасьці ў вайсковыя часткі прывезьлі каля 5000 чалавек