«Каб ня трэсьліся рукі». Падатковая інспэкцыя Менску папярэдзіла аб праверцы амаль 400 прыватных стаматолягаў

Ілюстрацыйная выява, ©️Shutterstock

У інспэкцыі патлумачылі, што праверкі ў недзяржаўным сэктары вырашылі правесьці па выніках апытаньня сярод грамадзян, якія выказалі пажаданьне аб навядзеньні «фінансавага парадку» ў трох кірунках паслуг — у інтэрнэт-гандлі, на рынках і ў стаматалёгіі.

Упраўленьне апэратыўных мерапрыемстваў Менскай інспэкцыі Міністэрства па падатках і зборах Беларусі папярэдзіла аб пачатку праверкі 387 уласьнікаў ліцэнзій на стаматалягічныя паслугі.

«Каб у вас ня трэсьліся рукі ў часе прыёму пацыентаў, упраўленьне вырашыла папярэдзіць аб сваіх плянах загадзя», — напісалі ў Telegram-канале ўпраўленьня.

У паведамленьні патлумачылі, што праверкі ў недзяржаўным сэктары вырашылі правесьці па выніках апытаньня сярод грамадзян, якія выказалі пажаданьне аб навядзеньні «фінансавага парадку» на трох кірунках паслуг — у інтэрнэт-гандлі, на рынках і ў стаматалёгіі.

ГЛЯДЗІЦЕ ТАКСАМА: Мінздароўя прыпыняе дзейнасьць мэдцэнтраў «Нардзін» і «Тры дантысты плюс»

«Па выніках папярэдняга аналізу мы сфармуем „чырвоную лігу“ суб’ектаў, у дзейнасьці якіх будуць усталяваныя нэгатыўныя адхіленьні. Потым фігуранты „чырвонай ліні“ пройдуць паглыблены аналіз, а пераможцаў у гэтым негалосным і неаўтарытэтным спаборніцтве чакае прыз — апэратыўнае мерапрыемства. Усе, каго гэта тычыцца, лічыце пост афіцыйным прафіляктычным мерапрыемствам», — сказана ў паведамленьні.

ГЛЯДЗІЦЕ ТАКСАМА: «Я прайшоў 90-я, але ніколі не плаціў бандытам». Вялікае інтэрвію з кіраўніком нацыяналізаванай сеткі клінік «Новы зрок». ВІДЭА