Савет Міністраў Беларусі ўвёў на паўгода ліцэнзаваньне на вываз жыта, ячменю, аўса, кукурузы, грэчкі, рапсу, проса, пшаніцы, апрацаванага збожжа і насеньня.
Як адзначаецца ў пастанове, ухваленай 10 красавіка і апублікаванай на Нацыянальным прававым інтэрнэт-партале Беларусі 12 красавіка, ліцэнзіі будуць мець разавы характар, а абмежаваньні экспарту будуць дзейнічаць цягам 6 месяцаў зь дня афіцыйнай публікацыі дакумэнту.
Дазвол на вываз збожжа будзе выдаваць Міністэрства антыманапольнага рэгуляваньня і гандлю Беларусі па ўзгадненьні зь Міністэрствам сельскай гаспадаркі і аблвыканкамамі.
Адной з прычын, чаму могуць адмовіць у выдачы ліцэнзіі, вызначылі нястачу гэтых відаў прадукцыі на ўнутраным рынку.
Збожжа, якое вывозіцца ў якасьці міжнароднай гуманітарнай дапамогі або на падставе рашэньняў ураду, ліцэнзавацца ня будзе.
Урад Беларусі ўводзіў аналягічнае абмежаваньне летась у верасьні, калі стала зразумела, што ад неспрыяльных умоваў надвор’я аграрны сэктар недаатрымае неабходны ўраджай збожжа.
Да расейскага ваеннага ўварваньня Расеі, якое падтрымаў Аляксандар Лукашэнка, Беларусь купляла збожжа ва Ўкраіне.
ГЛЯДЗІЦЕ ТАКСАМА: У Беларусі ўвялі ліцэнзіі на вываз збожжа, але і іх могуць ня выдаць, калі на ўнутраным рынку будзе нястача