У Міністэрстве абароны Беларусі паведамілі аб пачатку двухдзённых вучэньняў 120-й зэнітнай брыгады, у якіх возьме ўдзел вялікая колькасьць вайскоўцаў запасу.
«Вучэньні будуць праходзіць цягам двух содняў у пяці раёнах. Асаблівасьць вучэньняў у тым, што ўпершыню ў Вайскова-паветраных сілах і войсках супрацьпаветранай абароны маштабныя задачы выконваюць з прыцягненьнем вялікай колькасьці вайскоўцаў, прызваных з запасу», — працытавала прэсавая служба ведамства камандуючага Вайскова-паветранымі сіламі і войскамі супрацьпаветранай абароны Андрэя Лук’яновіча.
Камандуючы Вайскова-паветранымі сіламі і войскамі супрацьпаветранай абароны Андрэй Лук’яновіч
У часе вучэньняў плянуюць адпрацаваць «новыя спосабы» выкарыстаньня зэнітна-ракетнага комплексу «Бук», а таксама пытаньням «адбіцьця паветранага нападу праціўніка, у тым ліку пры дапамозе бесьпілётнікаў, павышэньня жывучасьці падразьдзелаў, разьмяшчэньня на мясцовасьці, маскіроўкі, супрацьдзеяньня дывэрсійна-выведным групам умоўнага праціўніка».
28 сакавіка стала вядома, што ў гэтай брыгадзе пачалі зьнімаць тэхніку з захаваньня і прыводзіць яе сілы ў гатоўнасьць для выкананьня задач. Яна дысьлякуецца ў Баранавічах Берасьцейскай вобласьці.
ГЛЯДЗІЦЕ ТАКСАМА: У Беларусі ў чатырох абласьцях пачаўся ключавы этап праверкі боегатоўнасьці11 сакавіка Міністэрства абароны Беларусі паведаміла аб пачатку ва Ўзброеных сілах праверкі баявой гатоўнасьці злучэньняў і вайсковых частак у адказ на правядзеньне ля межаў Беларусі вучэньняў NATO.
Першага красавіка ў Міністэрстве абароны Беларусі паведамілі аб пачатку вучэньняў з выкарыстаньнем рэактыўных сыстэм залпавага агню «Палянэз».
На тэрыторыі Беларусі ўвесь час ад моманту расейскага ўварваньня ва Ўкраіну амаль бесьперапынна праводзяцца вайсковыя вучэньні.
ГЛЯДЗІЦЕ ТАКСАМА: Лукашэнка ўцягвае Беларусь у вайну ці ён усё ж гарант міру? Які вобраз цяпер дамінуе