Суд у Жодзіне асудзіў галоўнага інжынэра аднаго зь філіялаў ААТ «Мінаблаўтатранс» на 2 гады калёніі-пасяленьня — ён дапусьціў да ўдзелу ў дарожным руху няспраўны МАЗ, што ўрэзаўся ў маршрутку ў Смалявіцкім раёне ў лютым 2023 году, паведамляе прэс-служба Вярхоўнага суду.
Акрамя гэтага, рашэньнем суду яго абавязалі выплаціць МНС 203 рублі 74 капейкі і 80 рублёў у лік кампэнсацыі матэрыяльнай шкоды, а таксама на 5 гадоў забаранілі яму займаць пасады, зьвязаныя з выкананьнем арганізацыйна-распарадчых абавязкаў.
Галоўнага інжынэра прызналі вінаватым паводле артыкула аб службовай халатнасьці, якая пацягнула за сабой па неасьцярожнасьці сьмерць чалавека (ч. 2 арт. 428 Крымінальнага кодэксу Беларусі).
У судзе ён сваю віну не прызнаў.
Паседжаньне па справе прайшло 5 красавіка, але яго вынікі сталі вядомыя толькі цяпер.
Паводле матэрыялаў справы, асуджаны ня спраўдзіў належным чынам тэхнічны стан самазвала МАЗ перад рэйсам. У выніку ў дзень аварыі 20 лютага 2023 году самазвал МАЗ выехаў на маршрут зь няспраўнасьцю хадавой часткі, выехаў на сустрэчную паласу на дарозе Смалявічы — Шацак і сутыкнуўся з маршруткай. У выніку аварыі загінулі 13 чалавек, яшчэ 7 атрымалі цяжкія цялесныя пашкоджаньні, гаворыцца ў паведамленьні прэс-службы.
Асуджаны працаваў галоўным інжынэрам з 12 траўня 2021 па 20 лютага 2023 году.
ГЛЯДЗІЦЕ ТАКСАМА: Колькасьць ахвяр аварыі ў Смалявіцкім раёне вырасла да 13 чалавек- 20 лютага 2023 году на дарозе Смалявічы — Шацак самазвал МАЗ сутыкнуўся з маршруткай. На месцы загінулі 11 чалавек, яшчэ двое памерлі пазьней у шпіталі.
- Раней кіроўцу грузавога аўтамабіля асудзілі ў гэтай справе на 7 гадоў калёніі.
- Паводле рашэньня суду сваякам загінулых у ДТЗ пад Смалявічамі мусяць выплаціць звыш 2,5 млн рублёў кампэнсацыі.