Украіна спыніла дзеяньне дамоваў зь Беларусьсю аб супрацы памежных абласьцей

Кабінэт міністраў Украіны спыніў дзеяньне дзьвюх дамоваў, якія вызначалі памежную супрацу зь Беларусьсю.

«Спынілі ў сувязі з карэннымі зьменамі абставінаў», — паведаміў у сваім тэлеграм-канале прадстаўнік ураду ў Вярхоўнай Радзе Ўкраіны Тарас Мельнічук.

Паводле яго, спынілі дзеяньне дамовы аб супрацы памежных абласьцей, падпісанай 12 траўня 1997 году ў Кіеве, і аб міжрэгіянальнай і памежнай супрацы, падпісанай у Кіеве 22 траўня 2013 году.

Дамова аб супрацы памежных абласьцей прадугледжвала садзейнічаньне гандлёва-эканамічным кантактам між Валынскай, Жытомірскай, Кіеўскай, Ровенскай і Чарнігаўскай абласьцямі Ўкраіны і Берасьцейскай і Гомельскай абласьцямі Беларусі.

Дамова аб міжрэгіянальнай і памежнай супрацы прадугледжвала разьвіцьцё гандлёва-эканамічнай, навукова-тэхнічнай, сацыяльнай, экалягічнай, культурнай, этнакультурнай і гуманітарнай супрацы між рэгіёнамі, у тым ліку памежнымі, а таксама ў разьвіцьці памежнай інфраструктуры.

Абедзьве дамовы падпісваліся на пяць гадоў і аўтаматычна працягваліся на наступныя пяць гадоў у тым выпадку, калі ня менш як за 6 месяцаў да заканчэньня адпаведнага тэрміну адзін з бакоў пісьмова не праінфармуе другі бок пра свой намер спыніць дзеяньне дакумэнту.

Якія яшчэ пагадненьні зь Беларусьсю дэнансавала Ўкраіна

Пасьля расейскага вайсковага ўварваньня, падтрыманага Аляксандрам Лукашэнкам і вайсковым кіраўніцтвам Беларусі, Украіна дэнансавала больш за 50 міжнародных дакумэнтаў, якія вызначалі супрацу зь Беларусьсю ў розных сфэрах — выйшла зь іх або спыніла іх дзеяньне. У тым ліку:

• аб назіраньні ў пунктах пропуску на мяжы;
• аб супрацы зь Беларусьсю ў авіяцыйным пошуку і ратаваньні;
• аб паветраных зносінах;
• аб свабодным гандлі;
• аб узаемных пастаўках у 1995 годзе ўзбраеньня, вайсковай тэхнікі, іншых матэрыяльных сродкаў;
• аб аказаньні паслуг дзеля патрэбаў абароны і бясьпекі ад 1994 году;
• аб дадатковых мерах даверу і бясьпекі;
• аб правядзеньні сумесных навукова-дасьледчых і досьледна-канструктарскіх работ у галіне ўзбраеньня і вайсковай тэхнікі;
• аб узаемнай ахове правоў на вынікі інтэлектуальнай дзейнасьці, створаныя і прадэманстраваныя ў ходзе двухбаковага вайскова-тэхнічнага супрацоўніцтва;
• аб узаемадзеяньні ў сфэры геадэзіі, картаграфіі і дыстанцыйнага зандаваньня зямлі;
• аб супрацы ў сфэры дасьледаваньняў і выкарыстаньня касьмічнай прасторы ў мірных мэтах;
• аб супрацы памежных структураў і малым памежным руху;
• аб супрацы ў сфэры кіналёгіі;
• аб уніканьні двайнога падаткаабкладаньня;
• аб супрацы ў галіне моладзевай палітыкі;
• аб вытворчай і навукова-тэхнічнай каапэрацыі прадпрыемстваў і арганізацыяў абаронных галін прамысловасьці;
• аб вадаплаўстве па ўнутраных водных шляхах;
• аб узаемным прызнаньні і эквівалентнасьці дакумэнтаў аб адукацыі і навуковых званьнях;
• аб супрацы ў сфэры атэстацыі навуковых і навукова-пэдагагічных кадраў;
• аб супрацы ў сфэры навукі і тэхналёгіяў;
• аб супрацы ў сфэры стандартызацыі, мэтралёгіі і сэртыфікацыі;
• аб супрацы паміж міністэрствамі ўнутраных спраў (міжведамаснае пагадненьне зь Беларусьсю);
• аб сацыяльнай абароне працоўных мігрантаў.

Разам з тым украінскае кіраўніцтва заяўляе, што не зьбіраецца разрываць зь Беларусьсю дыпляматычныя адносіны, хоць у парлямэнце пэрыядычна абмяркоўваюць гэтае пытаньне.