Міністэрства абароны Расеі раніцай 20 сакавіка паведаміла, што над Саратаўскай вобласьцю сродкі супрацьпаветранай абароны зьбілі 4 украінскія баявыя дроны.
Губэрнатар Саратаўскай вобласьці Раман Бусаргін удакладніў, што бесьпілётнікі зьнішчылі над горадам Энгельс.
«Сыстэма СПА спрацавала своечасова і эфэктыўна. Пацярпелых і разбурэньня інфраструктуры няма», — паведаміў ён.
Украінскай службе Радыё Свабода ў Галоўным упраўленьні выведкі Міністэрства абароны Ўкраіны паведамілі, што дроны пацэлілі ў аб'ект, а наступствы ўдару ўдакладняюць.
Чаму гэта важна
У Энгельсе Саратаўскай вобласьці знаходзіцца вайсковы аэрадром, на якім базуецца стратэгічная авіяцыя Расеі. Менавіта адсюль з пачатку расейскага ваеннага ўварваньня ва Ўкраіну ў паветра падымаліся бамбавікі для ракетных абстрэлаў аб'ектаў украінскай энэргетыкі. Афіцыйна аэрадром называецца «Энгельс-2». Ад яго да Ўкраіны больш як паўтысячы кілямэтраў.
Першы дронавы ўдар па гэтым аб’екце адбыўся 5 сьнежня 2022 году. Тады расейскія СМІ паведамілі, што бесьпілётнік пацэліў ва ўзьлётна-пасадачную паласу, два бамбавікі Ту-95 атрымалі пашкоджаньні, а два вайскоўцы — раненьні.
ГЛЯДЗІЦЕ ТАКСАМА: «Украіна зьмяніла геаграфію вайны»: удары «ў сэрца Расеі» па авіябазах. Здымкі з космасуПразь некалькі гадзін пасьля гэтага інцыдэнту Расея падняла з гэтага і іншых аэрадромаў дзясяткі самалётаў для нанясеньня аднаго з найбольш інтэнсіўных удараў па энэргетыцы Ўкраіны. Паводле Паветраных сіл Украіны, тады расейскія самалёты выпусьцілі па ўкраінскай тэрыторыі каля 70 ракет.
Другі інцыдэнт з пацэльваньнем бесьпілётніка адбыўся ў ноч на 26 сьнежня 2022 году. Тады Міністэрства абароны Расеі заявіла, што расейскія СПА зьбілі ўкраінскі бесьпілётнік на падлёце да аэрадрому, але пацьвердзіла гібель траіх сваіх вайскоўцаў тэхнічнага складу, якія знаходзіліся на аэрадроме. Украінскія СМІ пераконвалі, што ад гэтага ўдару пацярпела і авіятэхніка, але дакумэнтальных пацьвярджэньняў так і не зьявілася.
Пасьля інцыдэнту ўкраінская выведка паведаміла, што Расея нібыта перадысьлякавала частку бамбавікоў Ту-95МС з Энгельсу на авіябазу «Украінка» у Амурскую вобласьць — за 6 тысячаў кілямэтраў ад украінскай мяжы.
ГЛЯДЗІЦЕ ТАКСАМА: Мінабароны РФ: Авіябаза ў Энгельсе атакаваная ўкраінскім бесьпілётнікам. Загінулі трое вайскоўцаў29 сьнежня 2022 году, у дзень чарговага інтэнсіўнага ўдару па Ўкраіне, жыхары Энгельсу паведамілі аб некалькіх выбухах у раёне аэрадрому. Тады губэрнатар Раман Бусаргін заявіў, што тэрыторыі Энгельскага раёну спрацавала СПА, якая зьнішчыла «неапазнаны аб’ект».
Цяперашні інцыдэнт — чацьвёрты. У той жа час Украіне не прызнае сваёй адказнасьці за дронавыя атакі па аб’ектах на тэрыторыі Расеі.
ГЛЯДЗІЦЕ ТАКСАМА: Выведка Ўкраіны: пасьля трох атак на вайсковыя аэрадромы Расея перакідае бамбавікі ў іншыя рэгіёныВайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- 17 лістапада Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.