«Хочуць піць каньячок, а не ваяваць». Класкоўскі пра ваенныя схемы, мары генэралаў і пляны на Колю

Пра гэта разважае палітычны аглядальнік інфармацыйнага агенцтва «Позірк» Аляксандар Класкоўскі.

Цалкам размову глядзіце ў відэафармаце на Youtube.

Фрагмэнты размовы.

• Я нязгодны з камэнтатарамі, якія сьцьвярджалі, што Пуцін нібыта выкручваў рукі Лукашэнку, каб паслаць беларускіх вайскоўцаў на вайну з Украінай, а Лукашэнка гераічна супраціўляўся. Калі паміж Масквой і Менскам былі сапраўды сур’ёзныя спрэчкі, Крэмль паводзіў сябе іначай — не давалі нафты, газу, крэдытаў. А цяпер наадварот — Масква шчодрая як ніколі.
• Лукашэнку выгадна нагнятаньне мілітарысцкай гістэрыі. Ён любіць, калі нават у цывільных установах вайсковая дысцыпліна, дзе ўсе шчоўкаюць абцасамі і бяруць пад казырок. Акрамя ўсяго іншага, гэта дазваляе аргумэнтаваць «зацісканьне гаек».

• Лукашэнка разумее, што калі ўвяжацца ў вайну па поўнай праграме, так званая стабільнасьць, якую ён на нейкі час зацэмэнтаваў рэпрэсіямі, «папаўзе».
• Пасьля таго як Назарбаеў пацярпеў фіяска з транзытам улады ў Казахстане, Лукашэнка ад гэтага зарокся. Для яго найлепшы варыянт — як у Азэрбайджане, але малодшы сын, Коля, пакуль што занадта малы. Лукашэнка хоча расьцягнуць свой сыход на цэлую эпоху — у ідэале, пакуль не падрасьце малодшы сын.
• На маю думку, беларускія генэралы ваяваць рэальна ня хочуць. Ім хочацца дажыць да добрай пэнсіі і папіваць каньячок. Але яны, як папугаі, паўтараюць наратывы маскоўскіх генэралаў. Лукашэнка ня хоча ваенных авантураў, але іншая рэч, што ён вельмі залежны ад Масквы, і яго могуць уцягнуць у гэтыя авантуры насуперак ягонай волі.