У Польшчы папярэдзілі насельніцтва пра палёты авіяцыі каля мяжы зь Беларусьсю

Навігацыйнае папярэджаньне мусяць узяць пад увагу авіякампаніі і ўсе пілёты цывільнай авіяцыі. Яно будзе дзейнічаць з 5 лютага да 5 траўня.

Пілёты павінны быць на гукавой сувязі зь зямлёю на пэўных каналах. Таксама належыць абавязкова ўлучаць транспондэр — прыладу, якая аўтаматычна перадае інфармацыю пра самалёт у адказ на запыт зь зямлі.

Папярэджаньне распаўсюджваецца на раёны Польшчы ўздоўж межаў з Калінінградзкай вобласьцю Расеі, Беларусьсю і Ўкраінай.

Навігацыйныя папярэджаньні зьвязаныя з забесьпячэньнем нацыянальнай бясьпекі.

Раней NATO пачало самыя маштабныя вучэньні з часоў халоднай вайны. У вайсковых вучэньнях Steadfast Defender 2024, на якіх плянуюць удакладніць абарончыя пляны NATO наконт умацаваньня эўрапейскай бясьпекі ад роўнага па сіле праціўніка, бяруць удзел каля 90 000 вайскоўцаў з усіх краін Паўночнаатлянтычнага альянсу.

Вучэньні будуць праходзіць да 31 траўня ў два этапы: на першым этапе ў цэнтры ўвагі будзе марское ўмацаваньне праз Атлянтыку і ў Арктыцы, а на другім, які будзе адбывацца зь сярэдзіны лютага да канца траўня, — умацаваньне абароны ва ўсіх сфэрах ад Арктыкі да ўсходняга флянгу.

Вучэньні праходзяць у некалькіх ключавых эўрапейскіх краінах — уздоўж межаў з Расеяй, Беларусьсю і Ўкраінай. У прыватнасьці, адпрацоўваньне абаронных плянаў будзе адбывацца ў Фінляндыі, Эстоніі, Нямеччыне, Грэцыі, Вугоршчыне, Латвіі, Літве, Нарвэгіі, Польшчы, Румыніі, Славаччыне, Швэцыі і Вялікай Брытаніі.

Свае сумесныя манэўры, у тым ліку ў непасрэднай блізкасьці ад мяжы з Эўразьвязам, рэгулярна праводзяць Расея і Беларусь.