З 4 лютага грамадзяне Беларусі і яшчэ 27 краінаў змогуць наведваць Іран бязь візаў, паведаміў дзяржаўнаму інфармацыйнаму агенцтву IRNA намесьнік міністра замежных спраў гэтай краіны Рэза Бігдэлі.
Дасюль турыстычная віза ў Іран каштавала для беларусаў 15 эўра.
Прамых рэйсаў зь Беларусі ў Іран пакуль няма. 23 студзеня амбасадар Ірану ў Беларусі сустракаўся ў Менску зь міністрам транспарту і камунікацый Беларусі: падчас сустрэчы абмяркоўвалі арганізацыю прамых авіязносінаў паміж Тэгеранам і Менскам.
Агулам на сёньня грамадзяне Беларусі могуць наведваць без уязных візаў 43 краіны.
ГЛЯДЗІЦЕ ТАКСАМА: Апублікавалі новы рэйтынг пашпартоў. Беларускі стабільна найслабейшы сярод суседзяўАкрамя Беларусі, з 4 лютага Іран бязь візаў змогуць наведаць турысты з Бахрэйну, Босьніі і Герцагавіны, Бразыліі, Брунэю, Віетнаму, Індыі (пры падарожжы самалётам), Інданэзіі, Зымбабвэ, Камбоджы, Катара, Кубы, Кувэйту, Кіргізстану, Маўрыкію, Маўрытаніі, Мэксыкі, ААЭ, Пэру, Саудаўскай Арабіі, Сэйшэльскіх Астравоў, Сэрбіі, Сынгапуру, Танзаніі, Тунісу, Узбэкістану, Харватыі і Японіі.
Згодна з інфармацыяй на сайце МЗС Беларусі, грамадзяне Ірану могуць знаходзіцца ў Беларусі бязь візаў да 30 дзён, але з пэўнымі ўмовамі:
- прыбыцьцё ў Беларусь самалётам (пры гэтым прыбыцьцё і выбыцьцё не павінна ажыцьцяўляцца рэйсамі з/у Расею),
- наяўнасьць дзейнай шматразовай візы дзяржавы ЭЗ або Шэнгенскай зоны з адзнакай аб уезьдзе на іх тэрыторыю,
- зваротны авіябілет з пацьвярджэньнем вылету з Нацыянальнага аэрапорту Менск або аэрапортаў Берасьця, Віцебску, Гомля, Горадні, Магілёва на працягу 30 дзён з даты ўезду.