Блізкаўсходняе агенцтва ААН для дапамогі палестынскім уцекачам (англ. UNRWA), якое працуе ў палестынскай аўтаноміі і ў сэктары Газа, аб’явіла аб звальненьні некалькіх сваіх супрацоўнікаў. Іх падазраюць ва ўдзеле ў нападзе групоўкі ХАМАС на Ізраіль 7 кастрычніка 2023 году.
Паводле генэральнага камісара UNRWA Філіпа Ладзарыні, зьвесткі аб датычнасьці некалькіх супрацоўнікаў да нападу агенцтву перадалі ізраільскія ўлады. У агенцтве распачалі расьсьледаваньне.
«Любы супрацоўнік UNRWA, датычны да тэрарыстычных актаў, будзе прыцягнуты да адказнасьці, у тым ліку ў рамках крымінальнага перасьледу», — сказаў Ладзарыні.
Ён паўтарыў, што Блізкаўсходняе агенцтва ААН для дапамогі палестынскім уцекачам «самым рашучым чынам асуджае» напады, учыненыя 7 кастрычніка, і заклікае да неадкладнага і безумоўнага вызваленьня ўсіх ізраільскіх закладнікаў.
Ладзарыні праінфармаваў генсакратара ААН Антонію Гютэрыша аб «надзвычай сурʼёзных абвінавачваньнях, вылучаных у дачыненьні да супрацоўнікаў агенцтва». Ён не назваў колькасьць падазраваных супрацоўнікаў, аднак у заяве Дзярждэпартамэнту ЗША ўказваецца, што іх 12.
ЗША зьяўляюцца найбуйнейшым спонсарам UNRWA. На час расьсьледаваньня Вашынгтон прыпыніў яго фінансаваньне. Групоўка ХАМАС прызнаная ў ЗША тэрарыстычнай.
ГЛЯДЗІЦЕ ТАКСАМА: Міжнародны суд ААН заклікаў Ізраіль зрабіць захады для перадухіленьня генацыду ў Газе- UNRWA надае гуманітарную дапамогу больш чым двум мільёнам людзей, якія пражываюць у сэктары Газа, уключаючы неабходнае харчаваньне, лекі і жыльлё.
- Ізраіль раней неаднаразова крытыкаваў UNRWA, сьцьвярджаючы, што школы, якімі кіруе агенцтва, выкарыстоўваліся ХАМАС для тэрарыстычнай дзейнасьці. Паводле дадзеных ізраільскага боку, у выніку нападу ХАМАС і «Ісламскага джыхаду» ў Ізраілі загінулі каля 1400 чалавек, 240 — узяты ў закладнікі (большасьць зь іх застаецца ў палоне, некаторыя загінулі).
- У адказ Ізраіль, паабяцаўшы зьнішчыць ХАМАС, наносіць удары па сэктары Газа, які знаходзіцца пад кантролем групоўкі. Па дадзеных палестынскага боку, у выніку ізраільскага наступу загінулі больш за 26 тысяч жыхароў сэктару Газа.
Вайна Ізраілю з ХАМАСам. Асноўнае
- 7 кастрычніка Ізраіль зазнаў ракетны ўдар з боку сэктару Газа, а баевікі руху ХАМАС прарваліся на тэрыторыю краіны, забіўшы ня меней за 260 удзельнікаў музычнага фэсту і захапіўшы сотні закладнікаў. Некаторых людзей расстрэльвалі проста на вуліцах.
- Уварваньне з сэктару Газа адбылося ў 50-ю гадавіну пачатку вайны Суднага дня 1973 году.
- Армія абароны Ізраілю (ЦАХАЛ) у адказ на атаку пачала ваенную апэрацыю «Жалезныя мячы». Ужо 8 кастрычніка Ізраіль афіцыйна абвясьціў стан вайны.
- ХАМАС папярэдзіў, што будзе забіваць аднаго з закладнікаў кожны раз, калі ізраільскія вайскоўцы будуць бамбіць цывільныя аб’екты ў Газе.
- Іран заявіў, што не бярэ ўдзелу ў вайне, але адкрыта заявіў пра падтрымку дзеяньняў ХАМАСу. Найвышэйшы ўладар Ірану аятала Алі Хамэнэі заявіў: «Мы цалуем рукі тым, хто плянаваў напад на сыянісцкі рэжым».
- Колькасьць параненых беларусаў на 10 кастрычніка — 3 чалавекі. Стан адной з параненых жанчын цяжкі.
- 10 кастрычніка ў кібуцы Кфар Аза побач з сэктарам Газа выявілі целы дзясяткаў забітых, у тым ліку малых дзяцей.
- Міністар абароны Ізраілю Яаў Галант 11 кастрычніка заявіў, што войска пераходзіць да поўнамаштабнага наступу на сэктар Газа.
- Лібанская ўзброеная групоўка «Хезбала» 11 кастрычніка абстраляла супрацьтанкавымі ракетамі пазыцыі ізраільскіх вайскоўцаў і заявіла, што забіла і параніла іх.
- Па стане на 17 кастрычніка вядома, што ў Ізраілі з пачатку вайны загінулі трое грамадзян Беларусі.
- Ізраіль у лістападзе пайшоў у атаку на сэктар Газа і заявіў аб пашырэньні наземнай апэрацыі.
- 22 лістапада стала вядома, што Ізраіль і ХАМАС у Катары падпісалі пагадненьне ад замірэньні на 4 дні. Пазьней замірэньне падоўжылі, але ўжо 30 лістапада яно спынілася пасьля ракет з Газы па Ізраілі, заявілі ў ЦАХАЛ.
- За час замірэньня з палону ХАМАС было вызвалена 105 закладнікаў, а з ізраільскіх турмаў 240 палестынскіх зьняволеных.
- 6 студзеня Ізраіль заявіў пра тое, што поўнач Газы зачышчаная ад баевікоў ХАМАС.
- Ахвяры: па стане на 19 лютага 2024 году каля 1160 чалавек у Ізраілі, у асноўным мірных жыхароў, паводле зьвестак AFP на падставе ізраільскіх лічбаў. Баевікі ў першы дзень вайны захапілі каля 250 закладнікаў, 130 зь якіх застаюцца ў Газе, у тым ліку 30 меркавана загінуўшых, паводле зьвестак Ізраіля.
Міністэрства аховы здароўя Газы паведамляе, што ў выніку ізраільскай ваеннай кампаніі загінулі як мінімум 28 985 чалавек, пераважна жанчыны і дзеці.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.