У Менску зарэгістраваныя выпадкі кішачнай інфэкцыі сярод навучэнцаў сярэдняй школы № 165, паведаміла 10 студзеня прэс-служба Міністэрства аховы здароўя Беларусі.
Дзяцей з сымптомамі кішачнай інфэкцыі зьмясьцілі на даабсьледаваньне ў адну зь менскіх бальніц. Іх колькасьць у Мінздароўя не ўдакладнілі.
Прэс-сакратарка Мінздароўя Юлія Барадун заявила БелТА, што шпіталізаваныя школьнікі «адчуваюць сябе здавальняюча, іх стан стабільны».
Дырэктарка школы Натальля Зялкоўская расказала агенцтву «Минск-Новости», што першыя паведамленьні аб дрэнным самаадчуваньні дзяцей зьявіліся ў бацькоўскіх чатах яшчэ 9 студзеня. Паводле яе, школьнікі скардзіліся на галаўны боль і ваніты. Пасьля 20.00 некаторыя бацькі напісалі, што выклікалі дзецям хуткую дапамогу ў сувязі з пагаршэньнем іх стану. У 22.00 такія ж сымптомы праявіліся і ў некаторых навучэнцаў другой зьмены.
Паведамляецца, што цяпер ацэньваюць арганізацыю харчаваньня ў менскай № 165, «у тым ліку ўмовы прыгатаваньня і рэалізацыі страваў». Для лябараторных дасьледаваньняў адабралі пробы гатовых страў і вады, абсьледавалі пэрсанал харчовага блёка на кішачную групу інфэкцый.
Па факце распаўсюду кішачнай інфэкцыі ў школе «праводзіцца эпідэміялягічнае расьсьледаваньне і арганізаваны санітарна-проціэпідэмічныя мерапрыемствы», паведамілі ў Мінздароўя.
- У 2023 годзе ўдасканаленьнем сыстэмы школьнага харчаваньня займаліся чыноўнікі вышэйшага рангу, уключаючы прэм’ер-міністра Рамана Галоўчанку і старшыню Савету Рэспублікі Натальлю Качанаву.
- 21 верасьня на нарадзе ў Аляксандра Лукашэнкі Камітэт дзяржкантролю сумесна з Генпракуратурай прапанавалі стварыць міжведамасную камісію для кантролю гатоўнасьці сярэднеадукацыйных школ да 1 верасьня, якая, сярод іншага, ацэньвала б якасьць харчаваньня школьнікаў. Кіраўнік КДК Васіль Герасімаў зьвярнуў увагу Лукашэнкі на «факты недаўкладаньня прадуктаў, парушэньня тэхналёгіяў, негатоўнасьці харчаблёкаў».