У ноч на 2 студзеня расейцы нанесьлі інтэнсіўныя ўдары па Кіеве і Харкаве гіпэргукавымі ракетамі «Кінжал» і баявымі бесьпілётнікамі. Пацярпелі больш за 120 чалавек, пяць — загінулі.
Тэлеканал «Настоящее время» сабраў усю інфармацыю пра тое, як выратавальнікі, паліцыянты і мясцовыя жыхары эвакуавалі свойскіх жывёлаў разам з пацярпелымі з разбураных расейскімі ракетамі будынкаў.
Відэазапіс з выратаванымі жывёламі з Харкава і Кіева — сабакамі, катамі і папугаямі — апублікаваў у сацыяльных сетках прэзыдэнт Украіны Ўладзімір Зяленскі. Ён падзякаваў за працу выратавальнікам, мэдыкам, паліцыянтам, валянтэрам і супрацоўнікам камунальных службаў.
«Пакуль расейскія ракеты спрабуюць зьнішчыць усё жывое, мы намагаемся захаваць больш жыцьцяў і выратоўваем кожнага чалавека і кожную жывую душу. Гэта тыя каштоўнасьці, дзеля якіх мы штодзень змагаемся. Усе людзі і жывёлы, усё жывое патрабуе абароны, калі на зямлю тваёй краіны замахваецца расейскі акупант», — напісаў Уладзімір Зяленскі.
З аднаго жылога дому ў Кіеве змаглі выратаваць двух папугаяў і марскую сьвінку.
Фота выратаваных катоў апублікавалі на сваіх старонках у Instagram кіеўскія фатографы Канстанцін і Ўлада Ліберавы.
Ня ўсе жывёлы перажылі інтэнсіўны ракетны абстрэл Кіева 2 студзеня. Валянтэры «ЗооПатруль.UA» паведамілі, што легендарны кот Жоўцень памёр у прытулку — у яго ня вытрымала сэрца. «Сабакі дрыжалі, а Жоўцень проста замёр на месцы», паведамілі валянтэры.
Выратаваны ў Кіеве кот
У Жоўтня быў нялёгкі лёс. Сваё імя кот атрымаў па назьве месяца, калі яго знайшлі — у кастрычніку 2022 году («жовтень» па-ўкраінску — кастрычнік. — РС). Яго знайшлі на трасе зь перабітымі заднімі лапамі.
У студзені 2024 году ката плянавалі перадаць у Парыж у новую сям’ю. У прытулку яго называлі «лякальнай легендай» — ён быў галоўным у «катадоме» і быў вельмі добрым.
Ільвіца Юна
Пацярпела ад ракетнага абстрэлу львіца з Цэнтру выратаваньня дзікіх жывёлаў, які знаходзіцца ў Кіеўскай вобласьці. Аскепкі ракеты ўпалі за 300 мэтраў ад вальера, і двухгадовая афрыканская ільвіца Юна атрымала кантузію. Яе таксама плянавалі перадаць у Эўропу.
«Спачатку было вельмі шмат сьвятла, а потым шмат агню і дыму. Юна была адзінай на вуліцы. „Прыляцела“ ў поле, ніводнага дрэва між гэтым месцам і вальерам не было», — паведаміла дырэктарка цэнтра Натальля Папова. Паводле яе, Юну выратавалі, калі яна жыла ў маленькай клетцы з ільвом, які яе крыўдзіў, і яна ўвесь час знаходзілася ў стрэсе. Апроч таго, у жывёлаў было абмаражэньне, таму што клетка стаяла на бэтоне і не было ніякай падсьцілкі.
ГЛЯДЗІЦЕ ТАКСАМА: Адбыўся самы магутны абстрэл тэрыторыі Расеі за час вайны. У Белгарадзе загінулі 14 чалавек, больш за 100 параненых. ВІДЭАВайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.