Рэгіянальныя ўлады ў Сафіі пачалі дэмантаж манумэнта савецкай эпохі, у якім цэнтральнае месца займала постаць салдата.
Помнік у Сафіі быў узьведзены ў 1954 годзе і складаўся з трох бронзавых скульптур: савецкага салдата, маці зь дзіцем і рабочага.
Улады патлумачылі знос помніка меркаваньнямі бясьпекі, пасьля таго як экспэрты знайшлі буйныя расколіны ў структуры.
«Рэгіянальныя ўлады вырашылі дэмантаваць помнік Савецкай арміі, пасьля таго як дасьледаваньне паказала, што ён небясьпечны для мясцовых жыхароў», — паведаміла губэрнатарка Вяра Тодзева.
Пасьля дэмантажу помнік будзе выстаўлены ў Музэі сацыялістычнага мастацтва.
Помнік неаднаразова станавіўся аб’ектам замахаў невядомых мастакоў, якія размалёўвалі гарэльефы ў ружовы колер, апраналі іх у касьцюмы супэргерояў або размалёўвалі ў жоўта-блакітныя колеры ўкраінскага сьцяга.
ГЛЯДЗІЦЕ ТАКСАМА: У Кіеве пачалі дэмантаваць помнік камандзіру Чырвонай арміі Мікалаю Шчорсу- Пасьля пачатку поўнамаштабнага расейскага ўварваньня ва Ўкраіне масава мяняюць назвы населеных пунктаў, вуліц, сквэраў і паркаў, а таксама прыбіраюць помнікі і мэмарыяльныя дошкі, зьвязаныя з Расеяй або Савецкім Саюзам. У сакавіку Вярхоўная Рада Ўкраіны прыняла закон, які забараняе даваць геаграфічным аб'ектам назвы, зьвязаныя з Расеяй.
- Пазбаўляцца савецкіх помнікаў апошнім часам сталі і іншыя краіны – суседзі Беларусі — Літва, Латвія і Эстонія.