Літоўскія памежнікі перахапілі «плыт» зь беларускімі цыгарэтамі, які прыплыў зь Беларусі па Нёмане, паведаміла 11 сьнежня памежная служба Літвы.
У нядзелю ўвечары літоўскія памежнікі недалёка ад вёскі Шандубра заўважылі круглы плоскі прадмет, які захрас у траве ля берага. Падплыўшы бліжэй на службовым катэры, яны знайшлі трактарную шыну . Унутры было 1350 пачак цыгарэт NZ Gold зь беларускай этыкеткай, два GPS-трэкеры і дзьве SIM-карты.
Акрамя гэтага, у коле знайшлі паштоўку з выявай сьвятога Крыштапа і надрукаваную малітву кіроўцы на беларускай мове. Як заўважыў партал Reform.by, Сьвяты Крыштап (Хрыстафор) лічыцца апекуном перавозчыкаў і падарожнікаў. Ён разьмешчаны на гербе Вільні.
Знойдзены літоўскімі памежнікамі груз з электроннымі аксэсуарамі часова захоўваюцца на памежным пункце Друскенікі. Інцыдэнт расьсьледуецца.
ГЛЯДЗІЦЕ ТАКСАМА: У Літве кантрабандыстаў зь беларускімі цыгарэтамі ўдалося спыніць толькі стрэламі ГЛЯДЗІЦЕ ТАКСАМА: Шэсьць валізаў з кантрабандай: у Віленскім аэрапорце затрымалі грамадзяніна Беларусі