Як паведаміла прэсавая служба Ціханоўскай, палітыкі гаварылі пра тое, як спыніць абыход санкцый і закрыць шчыліны ў іх, бо Робэрт Габэк займаецца эканомікай у нямецкім урадзе.
Гаварылі пра тое, каб ФРГ не здымала санкцыяў супраць гандлю калійнымі ўгнаеньнямі. У нядаўняй рэзалюцыі Бундэстагу аб сытуацыі ў Беларусі таксама гучыць заклік не зьмякчаць санкцыі без рэальных прычын.
Апрача таго, гаворка вялася пра падтрымку працы беларускіх экспэртаў-эколягаў, пра ўдзел дэмакратычнай Беларусі ў міжнародных канфэрэнцыях на тэмы экалёгіі, навакольнага асяродзьдзя, незалежнасьці ад выкапнёвых рэсурсаў.
На сустрэчы абмеркавалі сытуацыю з палітвязьнямі ў Беларусі, саўдзел Лукашэнкі ў расейскай вайне супраць Украіны і дэлегітымізацыю ягонага рэжыму. Асобна гаварылі пра падтрымку незалежных мэдыяў, у прыватнасьці пра павелічэньне фінансаваньня беларускай службы DW.
Ціханоўская сустрэлася з міністаркай замежных справаў ФРГ Анналенай Бэрбак
Падчас сустрэчы 25 лістапада з Анналенай Бэрбак абмеркавалі легалізацыю беларусаў у Германіі, выдачу пашпартоў іншаземца і дакумэнты для беларускіх дзяцей, народжаных у Нямеччыне.
Сьвятлана Ціханоўская і міністарка замежных справаў ФРГ Анналенай Бэрбак
Міністарка паведаміла, што нямецкі ўрад ужо разаслаў інструкцыі па выдачы беларусам усіх неабходных дакумэнтаў, у тым ліку пашпартоў замежніка, ва ўсе дзяржаўныя інстытуты. Ціханоўская распавяла пра праект новага беларускага пашпарта.
Таксама гаварылі пра прыцягненьне рэжыму да адказнасьці праз міжнародны трыбунал за вываз украінскіх дзяцей і злачынствы супраць чалавечнасьці.
Бакі абмеркавалі супрацу ў межах G7, «Вялікая сямёркі», ды ААН. Ціханоўская і Бэрбак абмеркавалі шляхі падтрымкі палітвязьняў. Ціханоўская распавяла пра жахлівую сытуацыю з палітзьняволенымі ў Беларусі, пра Сяргея Ціханоўскага, Марыю Калеснікаву ды іншых палітвязьняў, пра якіх на працягу ўжо доўгага часу няма інфармацыі.
ГЛЯДЗІЦЕ ТАКСАМА: Ціханоўская на зьезьдзе нямецкіх «Зялёных» агучыла 4 практычныя просьбы ГЛЯДЗІЦЕ ТАКСАМА: Ціханоўская назвала выбары 2024 году «бязвыбарамі» і заклікала беларусаў «ня даць сябе падмануць» ГЛЯДЗІЦЕ ТАКСАМА: Сьвятлана Ціханоўская сустрэлася з прэм’ер-міністрам Партугаліі. Што абмяркоўваліХто такая Сьвятлана Ціханоўская
Сьвятлана Ціханоўская — беларускі палітык, былая кандыдатка ў прэзыдэнты Беларусі. Цяпер знаходзіцца ў Літве.
Сьвятлана Ціханоўская
- Сьвятлана Ціханоўская нарадзілася ў 1982 годзе ў Мікашэвічах (Берасьцейская вобласьць).
- 15 траўня 2020 году пасьля адмовы Цэнтральнай выбарчай камісіі зарэгістраваць мужа Сьвятланы, зьняволенага лідэра кампаніі «Страна для жизни» блогера Сяргея Ціханоўскага, Сьвятлана ад свайго імя падала дакумэнты на рэгістрацыю ініцыятыўнай групы. 20 траўня яе групу зарэгістравалі. 29 траўня кіраўніка яе выбарчага штабу Сяргея арыштавалі зноў.
- Кандыдаткай у прэзыдэнты Ціханоўскую зарэгістравалі 14 ліпеня 2020.
- Пасьля арышту прэтэндэнта на пасаду прэзыдэнта Віктара Бабарыкі і ўцёкаў за мяжу яшчэ аднаго прэтэндэнта Валера Цапкалы іх штабы аб’ядналіся з штабам Сьвятланы Ціханоўскай. Аб’яднаны штаб правёў пасьпяховую выбарчую кампанію з шматтысячнымі мітынгамі ў вялікіх і малых гарадах Беларусі пад бел-чырвона-белымі сьцягамі.
- Паводле афіцыйных зьвестак ЦВК, на выбарах Сьвятлана Ціханоўская набрала 10,09%, а Аляксандар Лукашэнка — 80,08%. Ціханоўская адмовілася прызнаць гэтыя вынікі і 10 жніўня асабіста накіравалася ў ЦВК, каб іх абскардзіць.
- З ЦВК палітык не вярнулася. Сувязь зь ёю зьнікла, празь некалькі гадзін у вэстыбюлі ЦВК яна паведаміла, што «прыняла рашэньне» і зьехала ў невядомым кірунку. 11 жніўня стала вядома, што яна ў Літве. Былі апублікаваныя два відэазвароты Ціханоўскай, адзін зь якіх быў запісаны ў ЦВК пасьля размовы з двума высокапастаўленымі сілавікамі, у ім Ціханоўская заклікае дэманстрантаў не выходзіць на вуліцы. Кіраўніцтва Літвы 11 жніўня заявіла, што звароты Ціханоўская запісала пад ціскам і шантажом.
- Празь некалькі дзён пасьля фактычнай «дэпартацыі» ў Літву Сьвятлана Ціханоўская заявіла, што бярэ на сябе ролю «нацыянальнага лідэра».
- 18 жніўня з ініцыятывы Сьвятланы Ціханоўскай у Беларусі была створаная Каардынацыйная рада для транзыту ўлады.
- 10 верасьня 2020 Сэйм Літвы прагаласаваў за прызнаньне Сьвятланы Ціханоўскай абраным кіраўніком Беларусі.
- Ад верасьня 2020 году Ціханоўская наведала з працоўнымі візытамі дзясяткі краін сьвету і сустрэлася зь іх лідэрамі. Сярод іх прэзыдэнт Францыі Эманюэль Макрон, канцлер Нямеччыны Ангела Мэркель, высокі прадстаўнік ЭЗ Жузэп Бурэль, прэзыдэнт ЗША Джо Байдэн ды інш.
- Сьвятлана Ціханоўская кантактавала з актыўнымі людзьмі ў Беларусі падчас пратэстаў 2020 і 2021 гадоў, прызначыла сваіх прадстаўнікоў для падтрыманьня лучнасьці з сацыяльнымі і прафэсійнымі групамі ў краіне.
- Ціханоўская выступіла за правядзеньне ў Беларусі новых празрыстых прэзыдэнцкіх выбараў пры міжнародным кантролі і актыўна заклікала міжнародную супольнасьць да ўдзелу ў арганізацыі перамоваў зь цяперашнім кіраўніцтвам Беларусі.
- За два гады Ціханоўская, яе штаб і зьвязаныя з ёй ініцыятывы дапамагалі палітвязьням, выступалі з шэрагам гуманітарных і палітычных ініцыятываў.
- Яна выступала супраць сфальшаванага канстытуцыйнага рэфэрэндуму, ініцыяванага Лукашэнкам у 2022 годзе.
- У лютым 2022 Ціханоўская асудзіла расейскую агрэсію супраць Украіны і саўдзел у ёй рэжыму А. Лукашэнкі, у сакавіку 2022 году стварыла беларускі Антываенны рух.
- У красавіку 2022 году Ціханоўская на канфэрэнцыі Рады Бясьпекі ААН заявіла, што «поўдзень Беларусі фактычна знаходзіцца пад расейскай акупацыяй».
- Ціханоўская правяла пасьпяховыя перамовы з урадам Польшчы і дамаглася асаблівых умоваў для прыезду і легалізацыі беларусаў, ня згодных з рэжымам Лукашэнкі.
- У жніўні 2022 году Сьвятлана Ціханоўская стварыла Аб’яднаны пераходны кабінэт, назвала чатырох сваіх прадстаўнікоў.
- У лістападзе 2022 Ціханоўская ўпершыню назвала сябе прэзыдэнтам-электам