За кандыдатуру Джонсана на пасаду сьпікера прагаласавалі 220 рэспубліканцаў з 221. Кандыдат ад Дэмакратычнай партыі Хакім Джэфрыс атрымаў 209 галасоў. Для перамогі неабходна было сабраць 217 галасоў.
Майк Джонсан вядомы як прыхільнік палітыкі Дональда Трампа — ён уваходзіў у каманду юрыстаў Трампа і абараняў экс-прэзыдэнта ЗША падчас абодвух імпічмэнтаў.
Таксама новы сьпікер Палаты прадстаўнікоў выступаў супраць наданьня дапамогі Ўкраіне. У прыватнасьці, Джонсан галасаваў супраць выдзяленьня Кіеву пакета дапамогі на 40 мільярдаў даляраў.
ГЛЯДЗІЦЕ ТАКСАМА: Украіна зноў у цэнтры ўвагі палітыкі ЗША. На гэты раз стаўкі вышэйшыяЯк паведамляе «Голас Амэрыкі», у першай прамове пасьля свайго абраньня сьпікерам Палаты прадстаўнікоў ЗША Джонсан заявіў пра непарушную падтрымку Ізраілю, неабходнасьць аховы паўднёвай мяжы ЗША і скарачэньне дзяржаўнага доўгу.
«Мы адновім давер да гэтага органа (Палаты прадстаўнікоў — РС]. Мы будзем прасоўваць усёабдымную кансэрватыўную палітычную праграму, змагацца са згубнай палітыкай адміністрацыі Байдэна і падтрымліваць нашых саюзьнікаў за мяжой», — гаворыцца ў заяве Джонсана, зробленай неўзабаве пасьля галасаваньня.
ГЛЯДЗІЦЕ ТАКСАМА: Як і чаму адхілілі сьпікера Палаты прадстаўнікоў ЗША. І што далей- 4 кастрычніка Палата прадстаўнікоў ЗША адхіліла сьпікера Кевіна Маккарці ад пасады — яго абвінавацілі ў супрацоўніцтве з дэмакратамі, якое дазволіла прыняць рашэньне аб часовым падаўжэньні фінансаваньня працы амэрыканскага ўраду.
- За адстаўку Маккарці выказаліся 216 кангрэсоўцаў, 210 выступілі супраць. Гэта стала першым выпадкам у гісторыі ЗША, калі заканадаўцы Палаты прадстаўнікоў прагаласавалі за адстаўку свайго старшыні.
- 1 кастрычніка прэзыдэнт ЗША Джо Байдэн падпісаў закон аб часовым бюджэце, які прадугледжвае фінансаваньне ўраду на бліжэйшыя 45 дзён, але не ўключае вайсковую дапамогу Ўкраіне. Раней закон ухваліла Палата прадстаўнікоў. Калі б гэтага не было зроблена, з 1 кастрычніка ўрад быў бы змушаны прыпыніць працу (акрамя экстраных службаў), дзясяткі тысяч фэдэральных службоўцаў адправілі б у адпачынак без захаваньня заробку.