Экспэрты амэрыканскага Інстытуту вывучэньня вайны (ISW) мяркуюць, што Расея зможа падтрымліваць дастаткова высокі ўзровень інтэнсіўнасьць абстрэлаў Украіны ў 2024 годзе дзякуючы ўласнай вытворчасьці і пастаўкам боепрыпасаў з Паўночнай Карэі.
У сваіх высновах экспэрты спасылаюцца на кіраўніка Цэнтра выведкі сіл абароны Эстоніі Антса Ківісэлга, які заявіў, што ў Расеі ўсё яшчэ застаецца каля 4 мільёнаў артылерыйскіх снарадаў, якія расейскія войскі могуць выкарыстоўваць для вядзеньня баявых дзеяньняў «нізкай інтэнсіўнасьці».
Паводле яго, ёсьць паведамленьні аб тым, што Паўночная Карэя адправіла ў Расею да 1000 кантэйнэраў з боепрыпасамі, у кожным зь якіх можна знаходзіцца ад 300 да 500 артылерыйскіх снарадаў — агулам ад 300 да 500 тысяч адзінак.
Паводле ўкраінскага боку, цяпер для абстрэлу Ўкраіны Расея выкарыстоўвае ў дзень ад 10 да 15 тысяч снарадаў, што значна менш, чым летам 2022 году, калі інтэнсіўнасьць абстрэлаў складала ад 45 да 80 тысяч снарадаў у дзень.
«Зыходзячы з заходніх ацэнак вытворчай магутнасьці расейскай артылерыі і сталага экспарту з Паўночнай Карэі, Расея, пэўна, зможа падтрымліваць у цэлым дастатковую інтэнсіўнасьць абстрэлаў у агляднай будучыні. У той жа час агульнае зьніжэньне інтэнсіўнасьці абстрэлаў можа перашкодзіць расейскім войскам весьці шырокамаштабныя наступальныя апэрацыі», — мяркуюць экспэрты ISW.
Паводле іх, актыўнасьць вайсковай дапамогі Ўкраіне з боку яе міжнародных партнэраў будзе ключавым фактарам, які вызначыць здольнасьць Украіны эфэктыўна супрацьстаяць расейскім абстрэлам.
ГЛЯДЗІЦЕ ТАКСАМА: Павольны прагрэс і вялікія страты. Заходняя выведка ацаніла наступ расейцаў пад Аўдзееўкай на ДанеччынеМінулая ноч была самай ціхай у тылавых гарадах Украіны
У апэратыўным камандаваньні Паветраных сіл Украіны паведамілі, што расейскія войскі ў ноч на 24 кастрычніка атакавалі дронамі тры вобласьці краіны — Хмяльніцкую, Віньніцкую і Мікалаеўскую.
Як адзначаецца ў афіцыйным паведамленьні, расейцы запусьцілі з Крыму шэсьць дронаў, але ўкраінскія супрацьпаветраныя сродкі зьбілі ўсе бесьпілётнікі. Улады ўсіх трох абласьцей паведамілі, што разбурэньняў і ахвяр удалося пазьбегнуць.
У прыфрантавых рэгіёнах, паводле Генэральнага штабу Ўзброеных сіл Украіны, расейцы нанесьлі 4 ракетныя і 68 авіяцыйныя ўдары па 110 населеных пунктах Харкаўскай, Херсонскай, Запароскай, Луганскай, Данецкай, Мікалаеўскай. Пад сталымі артылерыйскімі абстрэламі застаюцца населеныя пункты памежных з Расеяй Чарнігаўскай і Сумскай абласьцей.
ГЛЯДЗІЦЕ ТАКСАМА: Расейскія войскі абстралялі Херсон і два гарады Данецкай вобласьці: 5 чалавек загінулі, 6 параненыяВайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.