Падчас галасаваньня па пытаньні аб імпічмэнце прэзыдэнта ў парлямэнце Грузіі не змаглі сабраць 100 дэпутатаў, каб падтрымаць адхіленьне ад пасады Саломэ Зурабішвілі, паведамляе грузінская служба Радыё Свабода
Падчас абмеркаваньня пытаньня аб імпічмэнце на пленарнае пасяджэньне зарэгістраваліся 87 дэпутатаў. Некаторыя зь іх, узяўшы ўдзел у абмеркаваньні, адмовіліся галасаваць.
Па пытаньні імпічмэнту зарэгістраваліся 90 дэпутатаў, 86 дэпутатаў падтрымалі імпічмэнт прэзыдэнта, адзін быў супраць.
Сама Саломэ Зурабішвілі падчас свайго выступу заявіла, што сёньня ў парлямэнце не вырашаецца лёс кіруючай партыі і краіны.
«Вы падштурхняце краіну да ізаляцыі», — заявіла Саломэ Зурабішвілі сябрам кіроўнай партыі «Грузінская мара» з трыбуны парлямэнту.
Раней Канстытуцыйны суд Грузіі вызначыў, што прэзыдэнтка Саломэ Зурабішвілі парушыла Канстытуцыю. Канстытуцыйны суд Грузіі пачаў 3 кастрычніка першыя ў гісторыі краіны слуханьні аб імпічмэнце прэзыдэнткі Саломэ Зурабішвілі, які ініцыявала кіроўная партыя «Грузінская мара — Дэмакратычная Грузія» за нібыта парушэньне 52 артыкула Канстытуцыі аб прадстаўніцкіх паўнамоцтвах кіраўніка краіны.
Паводле нацыянальнага заканадаўства Грузіі, для імпічмэнту Зурабішвілі патрэбна падтрымка 100 дэпутатаў. Цяпер у складзе парлямэнту 140 дзейных дэпутатаў, у тым ліку 84 — парлямэнцкая большасьць і 56 — апазыцыя.
Хто такая Саломэ Зурабішвілі
Саломэ Зурабішвілі стала прэзыдэнткай Грузіі ў сьнежні 2018 году. Яна нарадзілася ў Францыі ў сям’і грузінскіх палітычных эмігрантаў і каля 30 гадоў працавала дыпляматам у Міністэрстве замежных спраў Францыі. У Грузію яна вярнулася ў 2003 годзе: спачатку ў якасьці амбасадара Францыі, а ў сакавіку 2004 году стала кіраўніком МЗС Грузіі ва ўрадзе Міхэіла Саакашвілі.
Тады ж яна атрымала грузінскае грамадзянства, хоць і захавала францускі пашпарт. У 2013 годзе менавіта праз другое францускае грамадзянства Цэнтральная выбарчая камісія адмовіла ёй у рэгістрацыі кандыдатам у прэзыдэнты. У 2018 годзе яна адмовілася ад францускага пашпарта і атрымала рэгістрацыю для ўдзелу ў прэзыдэнцкіх выбарах.
У кастрычніку 2005 году Саломэ Зурабішвілі адправілі ў адстаўку з пасады кіраўніка МЗС, пасьля чаго яна перайшла ў апазыцыю Міхэілу Саакашвілі. У 2018 годзе яна фармальна вылучалася як незалежны кандыдат, але яе кандыдатуру наўпрост падтрымала партыя «Грузінская мара», якая цяпер ініцыявала імпічмэнт.
У сакавіку 2023 году прэзыдэнтка Грузіі падтрымала пратэстоўцаў супраць закону аб замежных агентах, які ініцыявала кіроўная партыя.
ГЛЯДЗІЦЕ ТАКСАМА: У Грузіі пачаліся першыя ў гісторыі краіны судовыя слуханьні аб імпічмэнце прэзыдэнткі ГЛЯДЗІЦЕ ТАКСАМА: Прэзыдэнт Грузіі заявіла, што ў краіне засталіся 100 тысяч расейцаў, якія ўцяклі ад мабілізацыі