Уласьнік сацыяльнай сеткі Х (колішні Twitter), амэрыканскі бізнэсовец Ілан Маск на сваёй старонцы на гэтай плятформе апублікаваў фотакаляж з прэзыдэнтам Украіны Ўладзімірам Зяленскім з напружаным тварам і зрабіў пад ім подпіс: «Калі прайшло ўжо 5 хвілін, а ты дагэтуль не папрасіў мільярд даляраў дапамогі».
Публікацыя Ілана Маска набрала за некалькі гадзін больш як 34 тысячы камэнтароў, пераважна нэгатыўных. Карыстальнікі пісалі пра неабходнасьць падтрымліваць Украіну і нагадвалі яму, што пакеты вайсковай дапамогі — гэта ўкладаньні ў амэрыканскі вайскова-прамысловы комплекс, то бок у эканоміку ЗША.
— Elon Musk (@elonmusk) October 1, 2023
Карыстальнікі таксама пачалі публікаваць свае каляжы, на якіх Маск апрануты ў форму расейскай арміі, або ў выглядзе сабачкі на павадку ў прэзыдэнта Расеі Ўладзіміра Пуціна, або такі ж партрэт амэрыканскага бізнэсоўца, але з подпісам: «Калі прайшло ўжо пяць хвілін, а ты дагэтуль не сказаў ніводнай бязглузьдзіцы».
Вярхоўная Рада Ўкраіны ў сетцы Х апублікавала аналягічны каляж з партрэтам Маска і подпісам: «Калі ты ўжо пяць хвілін не распаўсюджваеш расейскую прапаганду» (цяпер гэтую публікацыю ўжо выдалілі, але невядома, з чыёй ініцыятывы — кіраўніцтва парлямэнту ці адміністратараў сеткі).
BBC назвала публікацыю Ілана Маска мэмам, які мяжуе з абразай. Украінскі журналіст-расьсьледавальнік Міхайла Ткач зьвярнуўся да Маска з адкрытым лістом «Ратаваньне сьвету — ня бізнэс».
- Ілан Маск пасьлядоўна выступае за скарачэньне вайсковай дапамогі Ўкраіне з боку ЗША і NATO і разьвязваньне канфлікту шляхам перамоваў.
- Год таму ён прапанаваў уласны плян спыненьня вайны на падставе правядзеньня рэфэрэндумаў на акупаваных Расеяй тэрыторыях, прычым Украіна павінна захаваць нэўтральны статус.