Палітыка

«Карта паляка», адміністрацыйны арышт — што яшчэ ў пастанове ўраду аб праверках пры прыёме на працу

Будынак КДБ у Менску. Ілюстрацыйнае фота.

Урад Беларусі зацьвердзіў палажэньне аб парадку арганізацыі праверкі зьвестак аб кандыдатах на асобныя пасады служачых, якія не зьяўляюцца дзяржаўнымі цывільнымі пасадамі.

«Зеркало» зьвярнула ўвагу на адпаведную пастанову, якая была апублікаваная на Нацыянальным прававым інтэрнэт-партале.

Цяпер пры прыёме пра працу будуць правяраць, ці прыцягваліся людзі ня толькі да крымінальнай, але і да адміністрацыйнай адказнасьці. Акрамя таго, будуць правяраць, ці зьвяртаўся кандыдат за атрыманьнем якога-небудзь «замежнага» дакумэнта — напрыклад, «карты паляка».

Каго будуць правяраць

  • Работнікаў, якія ажыцьцяўляюць забесьпячэньне дзейнасьці і тэхнічнае абслугоўваньне Апарата Савета Міністраў Рэспублікі Беларусь, рэспубліканскіх органаў дзяржаўнага кіраваньня, абласных, Менскага гарадзкога выканаўчых камітэтаў, гарадзкіх раённых выканаўчых камітэтаў, мясцовых адміністрацый раёнаў у гарадах;
  • работнікаў апаратаў арганізацый, падпарадкаваных ураду;
  • работнікаў апарата Ўпаўнаважанага па справах рэлігій і нацыянальнасьцей;
  • кіраўнікоў і намесьнікаў кіраўнікоў, кіраўнікоў кадравых службаў арганізацый, маёмасьць якіх знаходзіцца ў рэспубліканскай уласнасьці, гаспадарчых таварыстваў, больш за 50 працэнтаў акцый (долей у статутным фондзе) якіх знаходзіцца ва ўласнасьці Беларусі, якія ўваходзяць у склад арганізацый, падпарадкаваных ураду;
  • старшынь і намесьнікаў старшынь праўленьня абласных саюзаў спажывецкіх таварыстваў, абласных спажывецкіх таварыстваў.

Што будуць правяраць

Пры правядзеньні праверкі зьвестак аб кандыдаце на пасаду «вывучэньню і аналізу падлягаюць наступныя абставіны»:

  • Дакладнасць прадстаўленых кандыдатам на пасаду зьвестак;
  • наяўнасьць у кандыдата на пасаду судзімасьці (у тым ліку зьнятай або пагашанай ва ўстаноўленым парадку) або прыцягненьне яго ў якасьці абвінавачанага (падазронага) па крымінальнай справе, якая не разглядаецца судом, а таксама іншыя зьвесткі аб правапарушэньнях, якія захоўваюцца ў адзіным дзяржаўным банку даных аб правапарушэньнях, у дачыненьні да кандыдата;
  • зьдзяйсьненьне кандыдатам на пасаду дзеяньняў, якія ствараюць пагрозу нацыянальнай бясьпецы Беларусі;
  • інфармацыя аб невыкананьні кандыдатам на пасаду абмежаваньняў, устаноўленых заканадаўствам аб барацьбе з карупцыяй, учыненьні ім правапарушэньня, якое стварае ўмовы для карупцыі, або карупцыйнага правапарушэньня;
  • звальненьне кандыдата з пасады па падставах, якія прызнаюцца ў адпаведнасьці з заканадаўствам дыскрэдытуючымі абставінамі звальненьня;
  • парушэньне кандыдатам на пасаду абмежаваньняў, зьвязаных з дзяржаўнай грамадзянскай службай, ваеннай службай, службай у ваенізаваных арганізацыях;
  • парушэньне кандыдатам на пасаду заканадаўства аб дзяржаўных сакрэтах;
  • зварот кандыдата на пасаду ў падразьдзяленьні па грамадзянстве і міграцыі органаў унутраных спраў па пытаньні аб выезьдзе за мяжу на пастаяннае месца жыхарства або ў кампэтэнтныя органы замежных дзяржаў за атрыманьнем грамадзянства, а таксама дакумэнтаў, якія даюць правы на льготы і перавагі ў сувязі з палітычнымі, рэлігійнымі поглядамі ці нацыянальнай прыналежнасьцю (напрыклад, «картай паляка»);
  • ажыцьцяўленьне кандыдатам на пасаду ў парушэньне заканадаўства выезду з Беларусі (уезду ў Беларусь).
ГЛЯДЗІЦЕ ТАКСАМА: У Беларусі 23,5% жыхароў — пэнсіянэры, і толькі 17,8% — моладзь. Тлумачым, як гэта зьвязана з палітыкай

Хто будзе праводзіць такую праверку і ў які тэрмін

Праверку будуць праводзіць органы дзяржбясьпекі і ўнутраных спраў.

Указана, што праверка не павінна займаць больш за месяц, а «тэрмін прыдатнасьці» такога заключэньня — 6 месяцаў.

Рашэньне аб прыёме на працу будзе прымацца зыходзячы з вынікаў праверкі.

Пастанова ўступае ў сілу пасьля яе афіцыйнага апублікаваньня.

Раней для сілавікоў і асобных дзяржслужачых увялі абмежаваньні па выезьдзе за мяжу.